Sema Çaglak

 

ŞIRNEX - Hemsereka Komeleya Ziwan û Kulturî ya Birca Beleke Fatma Gîzleyîcîye bale ant serê muhîmîya ziwan û kulturê kurdî û vat: “Ziwan û kultur nasnameyê şarî yê. Ganî kurdî wayîrê ziwan û kulturê xo bivejîyî. Hemverê zextan de komeleya ma umud dana şarî.” 

 

Komeleya Ziwan û Kulturî ya Birca Beleke serra 2018î de bi amacê perwerdehîya ziwanê Kurdî û averberdişê kultur û hunerê Kurdî qezaya Cizîrî ya Şirnexî de ameye awankerdiş. Komeleye 3 aşmî verê cû kongreye xo yê asayî pê arde û seba donemo newe dest bi xebatan kerd. Komeleya ke hetê ziwan, kultur û edebîyatî de perwerdeyî dana hetê şarî ra raştê eleqeyêk gird yena. 

 

Hemsereka Komeleye Fatma Gîzleyîcîye derheqê xebatanê xo yê komeleye de qisey kerd.

 

‘Ma demek kilm de xebatanê xo gird kerdî’

 

Fatmaye dîyar kerd ke awankerdişê komeleye seba şarê Botanî hetê pawitişê kultur û ziwanî de muhîm a û wina vat: “Ma 3 aşmî verê cû kongreye xo pê ard û dest bi xebatanê xo kerd. Ma roja ewile de xeylê xebat û projeyan dabî vernîya xo û ma xebatanê xo dewam kenî. Demek kilm de komeleya ma xebatanê xo yê hetê kultur û ziwanî gird kerd. Hetê şarî de seba komeleya ma w wayîrvejîyayîşêk gird esto. Demêk bî ke proseso bîyaye, zext û hêrişan vera xebatê kultur û ziwanî de qelîyêk virazîyabî. La ma bi wesîleya komele dî ke çend lazimî bi xebatannê serê ziwan û kulturî esta.”

 

‘Bale û eleqeyêk gird seba komeleye estê’

 

Fatmaye tewr peynî vat ke seba komeleye xeylê muracatî yenê kerdiş û wina qedênaye: “Ma sinifanê xo awan kerd û xeylê muracatî seba perwerdeyê ziwanê kurdî virazîyayî. Vîşêrê perwerdeyî şîyayîş û ameyîşê komeleya ma zêde yo. No zî eleqe û bala serê komeleye mojnenî. Perwerdeyê ma yê ke sinifê asta yewine de qedîyabî nika asta diyîne de dewam kenî. Her sinifêk de nizdîyê 15 wendekarî estî. Hetê kulturî de zî xebatê ma dewam kenî. Ma seba gitar, erbane, govend û dengbêjîye zî perwerdeyî danî. Seba nê beşan zî xeylê muracat estî û perwerdeyîyê ma yê seba nê beşan zî dest pê kerdo. Ma hewte de di rojan seba nê beşan perwerdeyî danî û ma wazenê ke ser dengbêjîye de hîna zêde vinderî. Ma demanê verênan de amaç kenî ke keyeyê dengbêjan awan bikerî. Ma seba ke xebatanê xo zêde bikerî xebetîyenê.”

 

‘Tu astengî nêeşkena ziwan û kulturê ma qedexe bikero’

 

Fatmaye, dîyar kerd hemverê teda û hêrişê serê ziwanê komeleya înan umud dana şarî û vat: “Xeylêk reyan hemverê ziwan û kulturê teda û hêrişî yenê kerdiş. Hemverê nê hêrîş û tedayan komeleyê kultur û ziwanî umud danê. Seba ke meclîs, mektebî û heme sazgeh û dezgehê dewlete ziwanê kurdkî qedexe yo. Hemverê nê tedayan amancê ma şîyarkerdişê şarî yo. 21ê Sibatê Roja Ziwanê Dayîke zî nêzdî beno. Ma wazenê  vernîya a roje bi xebatê xo yê tewir bi tewir ke bikerê bale biancê serê heqê perwerdeyê bi ziwanê kurdkî û muhîmîyê ziwanî. Şarê kurdî bi serran o seba ke heqê perwerdeyî bi ziwanê dayîke dest bikerê, têkoşîn kenê. Seba nê 21ê Sibate Roja Ziwanê Dayîke ya Mîyanneteweyî seba ma muhîm o. ganî heme dezgehî ziwan û kulturî serê na roje de vinderê û nê xebetan zêde bikerê. Ma do xebetanê xo xurt bikerê.”

 

‘Ma do wayîrê nasnameyê xo vejîyê’

 

Fatmaye tewr peyîn wina vat: “Ganî her kes keyeyê xo bikero mekteb. Wa keyeyê ma tutanê xo bîyarê komele ke tutê înan kurdî bimusê û ê zî ziwanê xo tutanê xo rê bimusnê. Wayîrê vejîyayîşê ziwanî muhîm o. Ziwan û kultur, nasnameyê şarî yo. Ma do seba şaranê xo xebatê bi nê rengî tewr xurt bikerê. Wayîrê nasnameyê xo vejîyê.”