Melek Avci

 

ANQARA - Parlamentera HDPyî Gulîstan Kiliç Koçyîgîte bale ant serê tecrîdo ke ameyo girankerdiş û wina vat: “CPTyî şî zîyaretê Îmraliyî. Acaba çina bedelîya? Tu çîyêk nêbedelîya! Ma nika Birêz Ocalanî ra xeber nêgênî. Bi raştî wezîfeyê CPTyî çi yo? Vera ci raporê înan esto acaba? CPTyî ke wezîfeyê xo nêano ca tecrîdî ra berpirsîyar o.”

 

Partîya Demokratîke ya Şaran (HDP) hemverê tecrîdo girankerde yê serê Rayberê PKKyî Abdullah Ocalanî de 1ê çeleyî ra nata Nobeta Edaletî de yo. Parlamenterê HDPyî 27 rojî yo veng danê Wezîrîya Edaletî û hema zî yew cewabêk nêdîyayo înan.

 

Parlamentera HDPyî ya Muşî Gulîstan Kiliç Koçyîgîte derheqê nobete û tecrîdo giran de qisey kerd.

 

‘Şima mecburê ke heqê tepişteyan bidî’

 

Gulîstane dîyar kerd ke her ke şino tecrîd giran beno û no bi qestî heqê cuye yo û vat: “Eke Komara Tirkîya xo desturê bingeyînî reyde sînor kerda se û vaja ke ez dewletêk huqûqî ya ganî huqûq pê bîyara. Nêeşkena goreyê şexsan têbigêra. Nuqtayêk esasî yê desturê bingeyînî ra yew zî no yo ke merdiman cîya nêercneno. Beno ker merdimi bitepişo la ganî heqanê ci zî bido. Pêvînayîşê keyeyî nê heqanê esasîyan ra yew o. Ma Partîya Demokratîke ya Şaran nêeşkenê hemverê bêhuqûqîye de bêveng bimanî. Coka ra ma xeylê çalakî û bernameyan pê ard. Seba wedaritişê tecrîdî bi hezaran reyo ke ma meclîs de veng danî.” 

 

‘Vatişêk înan ke bêro vatiş çinî yo’

 

Gulîstane dîyar kerd ke seba muracatanê înan cewab nêdîyeno û wina dewam kerd: “Kewtî mîyanê hewldayîşanê polîtîkayê vîrîkerdişî. La êdî kerdî resaya este. Derheqê CPTyî de tay qewimîyayîşî estî. Dima ra ma dest bi nobete kerd. Ma şîyî verê wezîrîya edaletî la nêverdayî. Ma çalakîya xo berd verê bere Dîkmenî yê Meclîsî. Dima ra zî berd dekewtişê çapemenîye. Waştişê ma zelal o. Ma fikarin î. Roj bir oje fikarê ma zêdîyenî. 25 rojî yo ke partîya tewr gird ya hirîne raşteyan de ya. La ma cewabêk nêgênî. Vatişêk ke wezîrîya edaletî vaja çinî yo. De eşkenê se vajî.”

 

‘Heta ke pêvînayîş pê nêro do çalakîya ma dewam bikera’

 

Gulîstane qiseykerdişê xo yê peyênan de ard ziwan ke sey temsîlkaranê şarî heqanê hemwelatîyan ra berpirsîyaî û wina qedênaye: “Ma temsîlkarê şarî yî. Ma cuye, weşî û asayîşê şarî yî. Ma nêeşkenê hemverê binpaykerdişan de bêveng bimanî û coka ra ma nobete da dest pêkerdiş. Nobeta ma dewam kena. Vernîya ma de 15ê Sibate esto. Serrgêra komployî yo. Do çarçeweya na babete de xeylê çalakî û bernameyî pê bêrî. Do rayraşîyayîş pê bêro. Her cayê Tirkîya ra ver bi Anqaraye ra rayraşîyayîş bibo. Nobeta ma zî bade demek do açara çalakîya rayraşîyayîşî. Ganî hemverê bêhuqûqîyan de tu kes bêveng nêmano. Çimkî bêhuqûqîyî rayîrê bêhuqûqîyanê bînan zî akenî. Coka ra zî her ca de bê bahane rayaumûmîye hemverê nê zilmî de bibo cewab.”