AMED - Îdarekara MED TUHAD FEDî, avûkate Aslihan Bulut dîyar kerd ke veşnayîşê înfazî zêde bîyo, bi hawayêkê bêhuqûqî cezayê hucreyî yenê dayîş û vat, ganî binpaykerdişê heqan ê serê tepişteyan peynî bibê.

 

Pêwa binpaykerdişê heqan ê zîndanan de yenê ciwîyayîş, tehlîyeyê tepişteyan zî yenê astengkerdiş. Pêwa înfazê înan ameyo veşnayîş zî tepişteyê ke ganî bişert bêrê veradayîş, bi cezayê dîsîplînî yê ameyê birnayîş nînê tehlîyekerdiş. Îdarekara MED-TUHAD FEDî, avûkate Aslihan Bulut, da zanayîş ke muwekîlê aye Resul Baltaci û tepişteyê bînî pêwa 30 serrê xo pirr kerdê zî înfazê înan yeno veşnayîş.

 

‘Hemverê metodê têduştî yê’

 

Aslihane da zanayîş ke înfazê pêro tepişteyê Zîndanê Duzceyî ameyî veşnayîş û pêwa nê xeylêk zîndanan de veşnayîşê înfazî zêde bîyo û vat: “Resul Baltaci 30 serrî yo tepişte yo. La nêame tehlîyekerdiş. Aşma teşrîna peyêne de 30 serrî pirr kerd. Bahane zî  cezayê dîsîplînî bî. Zîndanê cinîyan ê Bayburtî de zî înfazê xeylêk tepişteyan ame veşnayîş. Tepişteyê ke hîrê aşmî cezaya hucreyî dayê û seba çarçewaya TMKyî de ameyê tepiştiş tehlîyekerdişê înan yeno astengkerdiş. No hemverê metodê bêtêduştî yo. Seba tepişteyanê edlî çîyêk winasî çin o. Tepişteyî tewr zêde eşkenê 30 serrî tepişte bimanê. Ganî dimayê 30 serrî bêrê veradayîş.”

 

‘Her çend ke înfaz temam bibo nînê verdayîş’

 

Aslihane dîyar kerd ke heme tepişteyê Duzceyî înfazê înan ameyî vêşnayîş û wina dewam kerd: “Cezaya hucreyî yê tepişteyan ke dîyaya bêhuqûqî ya. Nê cezayî binê berpirsîyarîya zîndanî de yê û seba ke înfaz nêbeno berpirsîyarî dîyeno mile tepişteyan ser. Yanî antiş û nêantişê cezaya hucreyî û dîsîplînî rewşêk ke tepişteyan eleqedar bikera nîna. Derheqê nê çîyî de qerarê mehkemaye esto. Ma derheqê muwekîlê xo Resul Baltaciyî de muracat kerd, bi muracatê ma pêro cezayî ameyî wedarnayîş. La her çend ke înfazê xeylê tepişteyan temam bîyo zî serbest nînê verdayîş.”

 

‘Metodê îşkenceyî esto’

 

Aslihane tewr peynî da zanayîş ke seba tepişteyanê ke 30 serrê înan debîyo caardişê taybet estê û zîndanê Espîye bi bahaneye rewşa baş çin a, tehlîyekerdişê tepişteyan 3 aşman taloq keno û vat: “Zîndanê Cinîyan yê Bayburtî de seba ke cezayê hucreyî yê verene ameyî dayîş pêro înfazî ameyî vêşnayîş. Leyla Saraça ke tehlîye bîbî tepîya ameye tepiştiş. Çimkî cezaya verêne ke ameya dayîş kerdî bahane û înfaz veşênayî. Nê caardişê taybet ê. Nê caardişî hemverê tepişteyanê sîyasîyan de estê. Zîndanê Duzce de bi bahaneye hûmartişê payan ser cezaya hucreyî dayî. Rojêk de di rayan yenê qawişan û hûmartiş pê anê. Tepişteyê nê çîyî qebul nêkerê ceza yena birnayîş. Coka ra ganî binpaykerdişê heqan yê serê tepişteyan û zextê zîndanan bi lez peynî bibê.”