MUGLA - Cezaya ke kiştoxê Pinar Gultekîn, Cemal Metîn Avciyî  ameybî birnayîş hetê îstînafî ra ame xerepnayîş û newe ra dosya şirawîya mehkema. Avukate Kubra Denîz Çelîke da zanayîş ke umudê înan no yo ke muhakemekerdişêk adilane bêro kerdiş û vengê paştîdayîşê rayaumûmî kerde.

 

Serra 2020î de Muglaye de wendekara unîversîteya Pinar Gultekîna 27 serrî hetê Cemal Metîn Avciyî (32) ra ameybî qetilkerdiş û kiştox sucê ‘bi hîssanê çimsûrî bi eziyet û plankerde merdime kişto’ ameyêne muhakemekerdiş û dewa do newe ra bêra dîyîş. Mehkema sucê ‘kiştişê kesan yê plankerde’ ra fînayîşê tahrîkê neheq pê arde û 23 serrî ceza da kiştoxî. 4ine Daîreya Mehkemaya Edlîyeya Herême ya Îzmîrî qerar xeripna û dosya ser de cigêrayîş kerd, tepîya şirawit mehkema. Dewa do newe ra bêra dîyîş û roniştişê dewaye do 11ê Sibate de bêro dîyîş.

 

Yew avukata keyeyê Pinare ra Kubra Denîz Çelîke derheqê dewaye de qisey kerd. 

 

Roniştiş 11ê Sibate de yo 

 

Kubraye da zanayîş ke qeraro ke derheqê kiştoxî de ameyo dayîş bêhuqûqî yo dozgerî derheqê ci de muracatê 4ine Daîreya Mehkemaya Edlîyeya Herême ya Îzmîrî da û vat: “Muhakemekerdişo newe ra na rewşe eşkena bêra raştkerdiş. Îstînaf esasî ra eşkayêne red bikero. La vat ke bêhuqûqî yo. Umudê ma no yo ke bivînê tahrîkê bêheq çin o. 11ê Sibate de roniştişê dewaya pê yeno. No roniştiş de do qerar bêro dayîş.” 

 

‘Do sucê bi hîssanê çimsûrîye kiştişê kesan ra ceza bêra waştiş’

 

Kubraye bale ant ‘fînayîşê tahrîko bêheq’ ke derheqê kiştoxî de ameyo dayîş ser û dîyar kerd ke fînayîşê sucî babeta vatişî yo û hemverê huqûqî de yo û wina vat: “Bi hawayêk ‘kiştişê kesan yê plankerde’ hukum dîya kiştoxî. La tîya de sucê ‘bi hîssanê çimsûrîye kiştişê kesan’ esto. Ma do no roniştişî de nê çîyî bîyarî ziwan. Umudê ma no yo ke waştişê ma verê çiman de bêrê girewtiş.”

 

‘Ma paştî pawenê’

 

Kubraye peynîya qiseykerdişê xo de ard ziwan ke tahrîko bêheq seba kiştoxî ameyo pêardiş, rayaumûmî de reaksîyonanê girdan rê rayîr akerdo û wina qedênaye: “Vera ke Pinare bi ganî ameya vêşnayîş tena 23 serrî ceza dîyaya kiştoxî. Tu wijdan nê qerarî qebl nêkeno. Rayaumûmî zî wijdan zî qebul nêkerdî. Ma pawenê ke edalet û huqûq pê bêrê. Ma na babete de vengê paştîdayîşî danê.”