Sema Çaglak

 

ŞIRNEX - Ayşe Acar pêwa emrê xo ke rexmê pêro zulm û zordestî de kelecanê xoverdayîşî û têkoşînî xo ya azadî ra tawîz nêdaya vana: "Dişmin ewro se bikero zî ma pey dewaya xo de yê, ma parçe bikerê zî ma xelas nêbenê û bi eynî hêrsî xo ver danê."

 

Xoverdayîşê azadîya şarê kurdî de cinî rayberî kenê. Dayîkê kurdî, dayîkê dej û zulmê înan rê ameyo kerdiş, bi xoverdayîş cewab dayê. Seba nasnameyêk azad û heqê xo bidest bikerê, xo ver dayê û xizmet seba dewaya azadîya şarê kurdî û cinîyan kerdê. Dayîkî eynî wextî de bîrê cuya tarîxê şarê kurdî yê. Nê dayîkan ra yewe zî Ayşe Acara ke pêwa emrê xo zî fek têkoşînî ra vera nêdaya. Keyeyê Ayşeye mabêne serranê 80î û 90î de hemverê ferzkerdişê qorîcîtî vejîyayê û rexmê pêro zulm û zordestîyan fek têkoşînê xo ra vera nêdayê. Ayşeya ke bi keyeyê xo reyde para xo zulm û zordestîya dewlete ra girewta zî xeylêk xebate û çalakîyê seba têkoşînê azadîya şarê

 

Kurdî û cinîyan de ca girewta

 

Ayşeya 70 serrî emrê ci esta, eslê xo dewa Meyîdînî ya girêdayê qezaya Cizîrî yê Şirnexî ra ya. Peynîya serrê 80yî de dimayê ke qorîcîtî keyeyê înan rê yeno ferzkerdiş, dewa xo ra koçber benê û dimayê demêk reyna agêrenê dewa xo, newe ra awan kenê. La reyna tedayê qorîcîtî dewam keno û reyke bîn benê koçber û merkezê Cizîrî de bi ca benê.

 

‘Barê zulmî giran o’

 

Ayşeya ke xeylêk nêweşî aye reyde peyda bîyê hema zî wareyê têkoşînê azadîye de eynî kelecanî ciwîyena.

 

Ayşe, vat: “Barê zulmî giran o. Ma dewe de bî, xeylêk teda û zordarî ma rê kerdî. Qorîcîtî ma rê ferz kerdêne. Ma qebûl nêkerdêne. Seba ke ma hemver vejîyayî, zulmê xo tewr zêde kerdî. Seba nê tedayab ma zî mecbûr dewa xo ra koçber bî. Dima ra ma reyna agêrayî dewa xo û newe ra dewa xo awan kerdî. La reyna belayê xo sawitî ma ra. Her reye de eştêne serê keyeyê ma, tedayê xo dewam kerdêne û qorîcîtî ferz kerdî. Vatêne yan bibê qorîcî yan zî dewe terk bikerê. Ma zî pêro mal û milkê xo uca de verda û ma uca ea vejîyayî û qezaya Cizîrî de bi ca bî. Rexmê zulmî de ma fek dewa xo ra vera nêda. Çi destê ma ra ame seba dewaya xo ma kerd. Ma girêdayeyê dewaya xo yê û poşman nîyê."

 

‘Qorîcîtî seba kurdan bêrûmetî ya’

 

Ayşeye dîyar kerd ke çiqas serê înan de zulm ameyîne kerdiş, hende hêrsê înan pîl bîne û vat: "Qorîcîtî seba ma bêrûmetîyêk xeylêk pîl a. Seba ke ma qorîcîtî qebûl bikerê xeylêk tedayî kerdî. La reyna ma qebûl nêkerdêne. Coka xeylêk bi hêrs bîne. Îşkence ma rê kerdî.  Pismamê mi berdî ma nêzana çi bici ame kerdiş. 2 aşmî vînî bi. Ma şî her ca gêrayî. Ma dima ra eşnawit ke xeylêk îşkence ci rê kerdê û ey eştê zîndan. Rêçê îşkenceyê serê rîyê ey de nîşan dayîne. Sewbîna xeylêk  merdimê ma ameyî îşkencekerdiş."

 

‘Ez tutanê xo rê hem bîya dayîk hem zî bîya pî’

 

Ayşeye dayîka 5 tutan a û seba ke mêrdeyo ke aye reyde zewcnaye bî aye terk kerd seba miqatekerdişê tutanê xo têkoşîn dana. Ayşeye wina qla prosesî kena: “Mi xeylê zehmetîyan ant. Tutê mi xeylê qirdî bî û ez bi tena serê xo bîya. Ez înan rê hem bîya dayîk hem zî bîya pî. Gama ke aye rojan ana xo vîr pê dejena. La mi qet hemverê zehmetîyan û zilmî de sere nêrona. Mîyanê nê zehmetîyan de mi têkoşînê azadîye seba şarê xo da. Ez sey dayîkêk û cinîyêk seba bîyayîş û azadîya şarê xo xebetîyena.”

 

‘Her çalakîye de cayê xo gêna’

 

Ayşeya ke xeylê çalaki û aktîvîteyan de cayê xo gêna wina dwam kerd: “Ma kewtêne grevê vêşanîye, mertalê zîncîrî, rayraşîyayîş û xeylê çalakîyê bînî de ma ca girewt. Xeylê zilm b ima ame kerdiş la reyna zî ma fek têkoşînê x ora vera nêda. Çi xizmet kewtêne milê ma ser ma kerdêne. Serranê 90an de seba tepişteyan ma kewtî grevê vêşanîye. Serê sibayî ra heta şewe vêşan û têşan ma xover dayene. Seba ke ma grev de bîyî îşkence b ima ameyêne kerdiş. Dormeyê ma girewtî binê abluqa û ma tehdît kerdî. Mi laçiqa xo ya keşke sûre û zerde berdêne û grevê xo dewam kerdêne. Aye wext şar de hêrsêk gird estbî.”

 

‘Ma timî xover da’

 

Torinê Ayşeye Firat Acarî zî şerê Kobanê de dinyaya xo bedelnayo. Ayşeye ard ziwan ke o seba ke şer vindero aye prosesî de şî Kobanê û wina vat: “Fikr û şike Firatî serê têgêrayîş de bî. Ma nêzanayêne ke şîyo. Dima ra ma eşnawit ke birîndar bîyo û dima ra xeber ame ke şehîd bîyo. Ma ci ra sere berz î û serfiraz î. Mi reyna fek dewaye ra vera nêda. Heta ke ez weş biba ez do dewaye pey de şêra. Şerê Kobanê de xeylê dayîkî şîbî ke şer bidî vindarnayîş û aştî pê bîyarî. Ez zî mîyanê înan de bîya û seba qewmê xo şîya. Ma ne werdêne ne zî şimitêne, ten ama xover dayene. Çîyo ke kewtêne milê ma ser se bibayêne zî ma kerdêne. La ma çend zî aştîye de israr bikerî dişmen zî hêriş û şerî de bi israr bî.”

 

‘Kurd eke yew bibî û bi tîfaq bibî do ser bikewî’

 

Ayşeye dîyar kerd ke zilmê dewlete vera kurdî zî zilm bi yewbînan kenî û bvat: “Zilmo ke bi ma yeno kerdiş tena yê dewlete nîyo. Eke Kurdî qorîcî û ajan nêbî hende zilm do bi ma nêameyêne kerdiş. Dişmenîya tewr xidar bi xo keno. Kurdî eke yew bibî û tîfaqê xo awan bikerî do ser bikewî. Nika şerêk gird esto û her hetî ra hêrişê kurdan kenî. Abdullah Ocalan binê tecrîdî de yo. Ma azadîya ci û azadîya heme tepişteyanê sîyasîyan wazenî. Waştişê ma bidestfînayîşê heq û nasnameyêk azad o.”

 

‘Heta peynî ma do dewaya xo pey de bî’

 

Ayşeye qiseykerdişê xo wina peynî kerd: “Gama ke çîyê ke ameyî serê mi yenê mi vîr ez hîssin bena. Emre mi vera pêro çîyê ke ameyî mi sere nînê mi vîr. Ê se bikerî zî ma ewro reyna dewaya xo pey de yî. Ma parçe bikerî zî ma xilas nêbenî û bi eynî hêrsî xover danî. Zilm qet xels nêbî û her reye bi şeklêk cîya zilm dewam kerd. Waştî ke kurdan qir bikerî û nasnameyê înan raşte ra wedarnî. La Kurdî hemverê zilmî de hende têkoşînê xo gird kerdî û zêde kerdî. Çi destê ma ra bêro ma do bikerî û nika zî çi destê mi ra bêro ma do bikerî. Heyecan û rihê mi yê xoverdayoxî hema zî ganî yo.”