KAYSERÎ – Tepişteya nêweşe Muhlîse Karaguzela ke Zîndanê Bunyanî yê Kayserî de wedarnayî nêweşxane, Muhlîse pêwa demarê qelbê aye xetimyayê zî reyke bîn şawitî zîndan.

 

Hemsereka Partîya Demokratîke ya Şaran (HDP) ya Bajarê Mûşî ke nêweş a û 8 serrî û 10 aşmî ceza ci rê ameya birnayîş, roja sêşeme reyke bîn Zîndanê Bunyanî yê Kayserî ke ci de mendêne, wedarnayî nêweşxane.

 

Demarê qelbê aye tenik bîyê

 

Goreyê agahîyê ke ameyê bidestkerdiş, Muhlîse roja sêşeme wedarnayê nêweşxane û nêweşxane de dimayê muayene ame kerdiş, vejîya werte ke damarê qelbê aye xetimyayê. Sewbîna ame vatiş ke doktorî dîyar kerdo ke demarê qelbê aye tenik bîyê, emalîyat zî tehluke yo.

 

Ame dîyarkerdiş ke Muhlîse pêwa nêweşîya ci reyke bîn şawitê zîndan. Muhlîse verê zî wedarnabî nêweşxane û stend kerdibi qelbê ci.