ÊLIH - Parlamenter û rîdarekarê HDPyî dewa Êlihî de serdayîşê şarê dewan kerdî û qalê tecrîdê Îmraliyî û geşedanê rojeve de kerdî. Cinîyan de vatî: “Kes nêeşkeno sereyê ma bitewênê."

 

Rêxistina HDPyî ya Bajarê Êlihî bajarokê Kaniyahenî û dewê derûdorê ci yê bi serê qezaya Hezoyê Êlihî de serdayîşê şarê dewe kerdî. Parlamentera HDPyî ya Êlihî Feleknas Ûca, Hemşaredara Êlihî Songul Korkmaza qeyûm tayînê vera ci ameyo kerdiş, Hemşaredara Hezoyî Nazîme Avci û îdarekarê HDPyî mîyan de dewan de serdayîşê şarî kerdî. Heyetê HDPyî heme dewan bi coş û kêfweşî ame pêşwazîkerdiş. Heyetê HDPyî serdayîşê dewan de qalê tecrîdkerdişê Rayberê PKKyî Abdullah Ocalanî, krîzê ekonomî û rojeva weçînayîşî ame kerdiş. 

 

‘Tecrîdo girankerde yê serê birêz Ocalanî dewam keno’

 

Şarê dewan bi flamayê kesk, sûr û zer pêşwazî heyetê HDPyî kerdî. Parlamentere Feleknas Ûca serdayîşê dewan de qisey kerd û vat: “Tecrîdo girankerdeyê serê birêz Ocalanî dewam keno. Bi sîlehê qedexekerde hêrişê kurdan kenê û kurdan kişenê. Hemverê şarê kurdî îşkence, talan û qetlîam pê yenê. Ma do sere de hemverê tecrîdî û heme hêrişan xo ver bidê û têkoşîn bikerê. Ma do bi xoverdayîşê xo de serbikewê.”

 

‘Kes nêeşkeno sereyê ma bitewênê’

 

Welatijê dewa Zîlane Safiya Kaya ke pêşwazî heyetê HDPyî kerd û wina vat: “Kes nêeşkeno pereyê ma bibirno. Pereyê ma besê ma yo. Ma serberz ê. Ma kurd ê. Kes nêeşkeno sereyê ma bitewêno. Heta ke ma sax bê û ma dinya de bê û dilopêk canê ma de bibo, ma nê  yê.”

 

Serdayîşê heyetê dewan bi coş û eleqeyêk pîlî peynî bi.