WAN - Wan de hemwelatîyî vayeyê ke timî yene kerdiş vera neêş kene seba zimistanî ardu bigêrî û dîyar kerdî ke adruyê xo ya yew bi yewe gênî ya zî pê gramî herînenî û sewbîna ardî ziwan ke berpirsîyarê na rewşe îqtîdar o.

 

Îqtîdarê AKP-MHPyî seba ke pêro çimeyanê welatî şerî rê birneno beno sebebe krîzê ekonomîyî. Vayeyê ke te dima yene kerdiş hêzê herînayîşî yê şarî fîneno war û her hetê komelî zirar vînenê. Wan ke zimistan xo dayo hîskerdiş de hemwelatîyî nêeşkenê arduyê vêşnayîşî bigêrî û heto bîn de bazaran ra zî pê destanê vengan agêrenê.

 

Taxa Xaçortî ya Wanî de bazaro ke ameyo awankerdiş de hem esnaf û hem zî  şar weşêka zehmetin de yî. Vera hewayo serdine tay heta şewe pawenê ke vaye bikewa û tay zî eşketê bazarî arê danî. Cinîyan dîyar kerdî ke berpirsîyarê na rewşe îqtîdar o û ganî her kes îtîrazê na rewşe bikero.

 

Cinîyan ra Halîme Agnaşa ke sere sibayî lez bazar de tezgah akena dîyar kerd ke pê rotişê layê ristinî îdareya xo kena û wina vat: “Vayeyê aşma verê cû hîna baş bî. Qet nêbo roje de 50 tl kare mi estbî. Bi zêdebîyayîşê vayeyan çîyêk nîno rotiş. Verê cû ameyîşê zimistanî reyde cinî layan girewtêne û domananê xo rê kincan û xoradayîşan viraştêne. La nika zaf vaye yo. Merdin êdî nêeşkeno tu çîyêk zî bigêro.” 

 

‘Berpirsîyar îqtîdar o’

 

Ferîde Çaliye zî qiseykerdişê xo de wina vat: “Ma nêşkenê lazimîyanê keyeyî bigêrî. Ez yena bazar, lazimîya mi bi xeylê çîyan esta la ez nêeşkena tu çîk zî bigêra. Tewir bi tewir sewze û fêkîyî estî. La ez nêşkena bigêra. Ez hewte de seba bazarî 100 TL cîya kena. La pê no pereyi dı kilo sewze nîno. Çîyê ke ez gêna zî yew di roje tena manenî. Sebebe krîzê ekonomîye îqtîdar o. Her ke şino waye zede bena. Şar perîşan bîyo. Na rewşe pê serewedarnayîşê şarî eşkeno vindera. Sewbîna rayîr çinî yo.”

 

‘Ma nêeşkenê nan zî bigîrê’

 

Cinîya bi nameyê Sevîm Gunaye da zanayîş ke ê nêeşkenê kolî û komir bigêrî û wina dewam kerd: “Kolî û komire çinî yî. Ser vera ma kincanê zêdeyan xora danî. Ma nêşkenê tu çîyêk bigêrî. Ma tena nan herînenî. Vayeyan vera ma nan zî zede nêşkenê bigêrî. Ez sere sibayî lez şina firin û nanê kehenan gêna. La ge-ge ma nêeşkenê nan zî bigêrî.”

 

 

‘Welat têk şîyo’

 

Behîce Burcuye zî bale ant faturayan û kîraya banî ser û vat: “Her çî bêmaben yeno vayekerdiş. Acaba ma xo biresnî kam cû. Ma nêşkenê na zî bigêrî. Acaba keyeyêk 10 nufusin do se bikero. Kîra, fatura û lazimîyê bînî. Welat êdî têk şîyo. Krîzê ekonomîye tesîrêk gird welatî ser de kerdo û kesek nêeşkeno kar temin bikero. Betalî vera domanê şinê dewan de şivanîye kenî. Pê pereyo ke gênî zî ma di aşman îdare kenî.” 

 

 

‘Ez sewze bi graman gêna’ 

 

Tewr peynî cinîyan ra Kader Işike qisey kerd û aye zî vat: “Goreyê verê cû no di serrî yo ke krîzêk gird esto. Ez ya yew bi yew ya zî pê graman lazimîyê keyeyî û sewze herînena. Yew zerrî verê cû ez pê 50 TL yî ameyêne bazar. Qet nêbo ma çend kilo çî herînayêne. Nika pê 300 TL yî yena la pê graman çî herînena. Ma êdi ameyê na rewşe ke nêeşkî çîyêk bigêrî.”