ŞIRNEX -  Gulberfîn Guleşa ke sey hobî dest bi karêdestî kerd, dima ra dikan akerd û kare ke sey hobî kerdêne aye rê bî çimeyê debarî û nika pê karêdestî îdareyê xo kena.

 

Awankerdoxî xozaya cinîye de esto. Bi berardiş û awankerdoxî cinî tim rengê xo daya dormeyê xo. Destpêkerdişêk şenik bi destê cinîye eşkeno seba amacêk gird bibo umud. Cinîya ciwane Gulberfîn Guleşa ke hema 19 serrî ya û pê kardestîye hewl dana îdareyê xo bikera, lazimî bi kesêk nêvînena. Gulberfîne qezaya Silopî ya Şirnexî de manena û renge cîyayan mîyan dikanê xo de hewênena.

 

Gulberfîne yew serrî verê cû dikanê aksesuarî akerde û tîya de dest bi rotişê kelupelanê ke bi destê xo viraşta kerde. Gulberfîne da zanayîş ke prosesê akerdişê dikanê aye binê krîzê ekonomîye de pê ame û wina vat: “Tutîya mi ra nata karê kardestî bala mi antene. Mi timî wextê xo yê vengan de kolye, zendik û xişîrê binî yê cîya cîyayan viraştêne. Bado ke ez bîya 18 serrî mi waşt ke ez dikanêk akera. Na her de keyeyê mi paştî da mi û mi dikanêk akerd. Heme çîyê ke pê destanê xo viraşt mi dikanê xo de ca kerd û mi dest bi rotişê înan kerd. Sere de mi dikanêk şenik de dest bi karî kerd la dima ra mi kare xo gird kerd. Ez zendik, kolye, vazo û kelepilanê dîyarîye, goşare û xeylê tewirê xişiran virazena. Ewil seba mo hobî bî. La dima ke mi dikan akerd seba mi bî çimeyê îdareyî.”

 

‘Krîzê ekonomî tesrî viraşt’

 

Gulberfîne bale ant tesîrê krîzê ekonomî ser û wina vat: “Çi heyfo ke krîzê ekonomî her ke şino xorî beno. Gama ke mi dikan akerd zî mi binê veristîya krîzê ekonomîye de akerd. Coka ra mi xeylê zehmetî ant. Her ke şino vaye zêde bena. Coka ra zêde qîmetê kardestîye nêmendo. Vayeyan vera zêde kes nêeşkeno herînayîş bikero û ez zî nêeşkena biroşa. Xeylê hemwelatîyî vayeyan ra şîkayet kenî, la çîyêk deste mi ra nîno. Xeylê reyan mexdur manenî. La no dikan sey xeyalê mi bî, no zî mi payan ser de vindarneno.”

 

‘Eke cinî biwaza eşkena serbikewa’

 

Gulberfîne, tewr peyîn qiseykerdişê xo de dîyar kerd eke cinî biwaza eşkena her çî bikera û wina vat: “Gama ez ez qij bîye, mi wextê xo yê vengî de tim mi xişir viraştêne û kêfê mi xeylêk înan ra ame. Seba mi hobîyêk bi la nika seba mi bîyo kar û pê debara xo kena. Wa cinî xo hewceyî tu kesî nêkenê. Çîyê tewr girîng oyo ke cinî bieşkê serê linganê xo de vinderê. Ez qet nêşîya perwerdeyî. Tena meraqa mi estbi. Eke cinî biwaza eşkena her hewa serbikewa.”