WAN - Pakîze Canbutle dîyar kerd ke probleme ekonomîye vera feqîrîya înan hîna zêde bîya û wina vat: “Çîyo ke ma cuyenê krîz nîyo feqîrî yo.”

 

Netîceyê polîtîkaya îqtîdarî de krîzê ekonomîye her ke şino hîra beno û tesîrêk gird komelî ser de keno. Bi taybetî Kurdistan de çimeyê îdareyî bi çinîbîyayîşî reyde rî bi rî yî û şar hewl dano çareserî bi xo awan bikero. Cinîyan bi nameyê Pakîze Canbutle ya ke qezaya Bêgirîye ra ameya merkezê Wanî de bi ca bîya, çîyê ke cuyaya feqîrîya şarî hîna zêde mojneno. Seba ke serd, vewre û varan nêkewî zerre lihêfî fînayî şibakanê xo yê şikiteyan, odeyê înan heme ke rutubetin û serdin merdim nêeşkeno dekewo zerre. Dolabê werdî veng o, maseyêke şikite esta, kincê mektebî yê ke bi destan ameyî şitiş teber de ameyî rafînayîş û cemed estê. Pakîzeye tena yew odeyêk de soba ronaya û bi mêrdeyo bêkar û 5 tutan reyde têkoşînê cuye dana.

 

Mecbur mende tutanê xo mektebî ra bigêra

Pakîzeye taxa Beyuzumu de cuyena û di serrî verê cû problemanê ekonomîye vera Bêgiye ra ameya û probleme feqîrîye merkez de her ke şîyo zêder bîyo. Pakîzeye dîyar kerd ke seba ke nêeşkaya lazimîyanê tutanê xo bigêra di tutanê xo mektebî ra girewta û tutêk aye firin de roje de bi 30 TL yî xebetîyeno û tutêk bîn zî tebere bajarî de rojane xebetîyeno. Pakîzeye zî mektebê dayîke de rojane bi 30 TL yî xebetîyena û aşma aye tena kîra nêvejêno.

 

‘Feqîrî pêşê ma nêverda’

 

Pakîzeye çîyê ke cuyaya û cuyena wina vat: “Feqîrî pêşê ma nêverda. Roje seba mi 05.00î de dest pê kena. Ez lajê xo bena firine. Dima ra tutan şirawena mekteb. Çîyêk çinîyo ke tutê mi biwerî. Vêşan şinê vêşan yenê. Rojane bi 30 TL yî ewnîyena tutan. Ez gure ra yena soba tafînena û eke çîyêk bibo ez werd virazena.”

 

‘No zilm û feqîrî yo’

 

Pakîzeye wina dewam kerd: “Çîyê ke ma cuyenî feqîrî, zilm û zext o. Cuya mi bi têkoşînî derbaz bî. Krîzê ekonomî tesîrêk gird mi ser de viraşt. Mi hema ardu nêgirewt. Vaye vera ez nêeşkena komir bigêra. Ez aşme de yew tewre kolîyan gêna. Aye zî bi hetkarîya merdimanê xo gêna. Kênaya mi şina lîse. Ode sey cemedî ya. Nêeşkena dersanê xo bişuxula. Ma nêeşkenê çîyêk biwerê. Makînaya kincşitişî çinî ya. Ez û tutê xo vêşan cuyenî. Ez nêeşkena lazimîyanê înan yê mektebî bigêra. Bifikirêne ez aşme de tena yew rey fekîyan tutanê xo rê gêna.”

 

Pakîzeye wina qiseykerdişê xo peynî kerd: “Seba cereyan zêde nêro ma televizyon anêkenê. Ma nêeşkenê hemverê zeman de têkoşîn bikerê. Na feqîrî nîya teda ya. Tena çar dêsî û serê ci ameyî girewtiş. Rutubet vera ma nêeşkenê zerre de bimanê. Tutê mi nêweş kewenê. Kênaya mi nêweş kewt û bi aşman weş nebîye. No çîyo ke ma cuyenê kriz nîyo, feqîrîyêk gird o. Ma hesretê nanê wuşkî yê. Waştişê mi tena no yo ke wa tutê mi nanêk asan biwerê.”