Gulîstan Dursun

 

STENBOL - Verfeka HDPyî Ebru Gunaye derheqê qerarê Mehkemaya Desturê Bingeyîn ke hesabê bankayan yê xezîneyî bloke kerdbî de qisey kerd û vat: “No qerar meşru nîyo. Do şar xeta pawitişî raşteyan de aver bero. HDP rih o, HDP fehm o. No rih heme komelî de vila bîyo. Coka ra zî heta ke ma nêvajê qedîyayo çîyêk nêqedîyeno.” 

 

Serdozgerê Komare yê Mehkemeya Berze Bekîr Şahînî îdîanameyê waştişê qefilnayîşê vera Partîya Demokratîke ya Şaran (HDP) sey sebebî mojnabî û waştbî ke qerarê blokekerdişî yê hesabanê bankayan yê hetkarîya xezîneyî seba HDPyî bêro dayîş. Mehkemaya Desturê Bingeyîn (DDB) seba ke bahane nêameybî pêşkêşkerdiş, waştiş red kerd. Serdozger Bekîr Şahînî newe ra 19ê Kanûne de waştişê blokekerdişî kerd. DDB 6ê Çeleyî de no waştiş qebul kerd û hesabo ke seba partîye estbî yê hetkarîya xezîneyî bloke kerd. Qerar avûkatanê endamê Komsîyonê Huqûqî yê HDPyî rê nêame teblîgkerdiş. Qerar sere de çapemenîya hetgirî yê îqtîdarî de ame serwîskerdiş. No qerar hetê xeylê kesan ra bî sebebê reaksîyonan û netîceyê de bi taybetî wayîrvejîyayîşêk HDPyî vejîya raşte.

 

Verfeka HDPyî Ebru Gunaye qeraro ke ameyo dayîş ajansê ma rê ercnaye.

 

‘DDB tewrê kayê weçînayîşî yê AKPyî bî’

 

Ebruye da zanayîş ke AKP-MHP û hetê netewperestî demêk dergo ke seba destronîşê hetkarîya xezîneyî, seba girewtişê parîya înan û partîye veng danê û na kampanyayêk sîyasî ya û qiseykerdişê xo wina dewam kerd: “Qeraro ke ameyo dayîş huqûqî nîyo. Qerar sîyasî yo. Akerdişê dewaya girewtişî ra nata dozger di reyan waştiş red kerd. No proseso ke tede weçînayîş yeno munaqaşakerdiş de hadreyîya weçînayîşî yeno kerdiş de û sewbîna HDP yo ke seba Tirkîya hêzêk muhîm o, no qeraro ke ameyo dayîş hemverê esas û usulî yo. Mehkemaya Desturê Bingeyîn zî tewrê kayê AKPyî bî.”

 

Çembera bêhuqûqîye

 

Ebruye nêrazîbîyayîşê xo wina mojnaye: “Prosesê dewaye de DDB eşkeno di qerar bigêro. Ya şima do vajî ‘partî do bêra girewtiş’ ya zî şima do vajî ‘şertê girewtişê aye partîye nêameyî awankerdiş’ û şima ra do qerarê derheqê hetkarîya xezîneyî bidîyo. Mehkemaya Desturê Bingeyîn qerarêk da û îmze eşt bine qerarêk zaf şaibe.” 

 

‘Destnêdayîş çinî yeno hesibnayîş’

 

Ebruye vat ke qerar do sey lekeyêk sîya derbazê tarîxî bibo û vat: “Mîyanê bahaneyanê qerarî de qiseykerdişê parlementeran yê parlementoyî estê û wina domnaye: “Serdozgerîya Komare ya Dadgerîye bi no hawa meclîs, destnêdayîşê kursî û îradeya Tirkîya çinî hesibna. Wexto ke destnêdayîş ame wedarnayîş ma vat ke no hêriş tena hemverê de nîyo, hemverê desturê bingeyîn û muxalefetî de yo. Merheleya ke ma nika tedeyî de her çî baş yeno zanayîş.”

 

‘Wazenê muxalefetî teberê sîyasetî de bigîrê’

 

Ebruye vat ke prosesê îtîrazkerdişê qerarî dest pêkerdo û nê çîyan arde ziwan ser: “AKP-MHP seba ke faşîzmê xo daîmî bikerê, seba ke muxalefetî teberê sîyasetî de biverdê, krîmînalîze û terorîze bikerê her tim muhakeme şuxulnenê. Hemverê têkoşînê huqûqî, ma do bi şaran, cinî, ciwan û heme kesê demokratan reyde wazenê xeta pawitişî aver berê. HDP rih û fehm o. Bi dêsanê awanîye sînor nêbenê. No rih êrdî vilayê komelî bîyo. Coka ra ma do xeta xo raşteyan de û her ca de têkoşînê xo pê bîyarê. Ma do pîya bibedelîyê. Nika wext wextê qezenckerdişî yo.”

 

‘Ma do bi namzedanê xo şêrê’

 

Ebruye qiseykerdişê xo wina peynî kerd: “Ma sey HDPyî do bi namzedanê xo reyde şêrê weçînayîş. Babete babeta ke bi nameyan reyde şêrê weçînayîşî nîya. Babete babeta demokratîkbîyayîşê Tirkîya ya. Coka ra zî qerardarîya ma ya ke ma bi xeta têkoşînê şêrê weçînayîş, esta. Ma timî vat. Dezgehê ma yê ke xebate rayra benê estê. Kêy wext û cayê ci bêro ma do her çîyî rayaumûmîye reyde pare bikerê.”