RIHA - Avûkatanê keyeyê Şenyaşarî seba roniştişê dewaya hêrişê nêweşxaneyî ke do 17ê çele de bêro vînayîş, venga beşdarîya dewaya hetê hîsgêrî kerdî û waştî ke paştdayîş bidê têkoşînê edaletî yê keyeyî.

 

Qezaya Pirsûsî yê Rihayî 14ê Hezîrana 2018ine de vernîya weçînayîşê pêroyî de merdim û pawitoxê parlamenterê AKPyî Îbrahîm Halîl Yildiz hêrişê dikanê keyeyê  Şenyaşarî kerdibi û hêrişê verê nêweşxaneyê Dewlete yê Pirsûsî de dewam kerdibi. Hêrişê verê nêweşxaneyî de Haci Esvet Şenyaşar û lajê ci Fadil û Adil Şenyaşar amebî qetilkerdiş. Emîne Şenyaşar û bi lajê xo Ferît Şenyaşar reyde 9ê Adara 2021î de verê Edliyeyê Rihayî de waştişê edaletî kenê ke dewa bi ca bêro.

 

Cipersayîşê serebûtî cayê sey “hêrişê kargehî” û “hêrişê nêweşxaneyî” ame îdarekerdiş. Dimayê qirkerdişî 4 serrî û 4 aşmî ra dima îdianame ame amadekerdiş. Roniştişê ewilî yê dewaya verê nêweşxaneyî do 17ê çeleyî de 5ine Dadgeha Cezaya Giran ya Meletî de bêro vînayîş.

 

Avûkatê dewaya keyeyê Şenyaşarî derheqê roniştişî de yeno kerdiş, awanîya  Komeleya Huqûqnasê seba Azadîye (OHD) ê Şubeyê Rihayî kombîyayîşê çapemenîye organîze kerd. Ferît Şenyaşar ke birîndarî hêrişan ra xelisya, tewrê kombîyayîşî bî.

 

‘Cipersayîş sey ameyîne waştiş nêame kerdiş’

 

Avûkata keyeyî ra Sevda Çelîk Ozbîngol eşkerayîye da û qalê çîyê roja serebût  qewimya kerd û bale ant detayê serebûtî. Sevda vat, cipersayîşêk bi tesîr nêameyo rayraberdiş û seba nê zî bi cîyakerdişê dosyayan ra yewbîyayîşê dosya xira bîyo û yê ke fermanê serebûtî dayî daxilê dosya nêameyî kerdiş. Sevdaye vat, serê delîlê sey  beyanê şahidan, dîmenê mobeseyî, raporê tibê edlî, agahîyê neqlkerdişî û dayeyê qeydê sînyalî ameyê nimitiş û bi no hewa cipersayîş ameyo kerdiş. Sevda vat, bi no hewa d qerarêk heqaniyet zî nêvejîyo û kiştox zî serbest gêrenê û rojane cuya xo dewam kenê.

 

Sevda nobeda edaletî ya keyeyê Şenyaşarî ard vîr û vat ke seba nobete xeylêk dewa û cipersayîş Emîne Şenyaşare rê ameyê akerdiş û muameleyo xirab aye û lajê aye Ferîtî rê ameyo kerdiş.

 

Venga tewrbîyayîşî ame kerdiş 

 

Sevda derheqê cipersayîşê “nexweşxaneyî” de agahî da û venga her hetî û kesê hîsgêrî kerd ke roja 17ine aşme tewrê roniştişî dewa bibê û wazenê her kes paştdayîş bido têkoşînê edaletî yê keyeyê Şenyaşarî.