Rozerîn Gultekîn

 

STENBOL - Parlamentera HDPyî ya Agirî Dîlan Dîrayet Taşdemîre derheqê qerarê DDByî ke hesabê xezîneya înan ameybî bloqekerdiş de qisey kerd û vat: “Ma do hemverê qeraro ke bi zîhnîyetê binpaykerî girewto de bi artêşa zerrîdayoxan prosesê weçînayîşî de xebatanê xo dewam bikerê.”

 

Mehkemeya Qanûnê Bingeyî hetkarîya xezîne ya seba Partîya Demokratîke ya Şaran (HDP) bloke kerdbî. Serdozgerê Komare yê Mehkemeya Berze Bekîr Şahînî îdîayê dewaya qefilnayîşê vera HDPyî sey sebebî mojnabî û waştbî ke qerarê blokekerdişî yê hesabanê bankayan yê hetkarîya xezîneyî seba HDPyî bêro dayîş. Mehkemaya Desturê Bingeyîn (DDB) seba ke bahane nêameybî pêşkêşkerdiş, waştiş red kerd. Serdozger Bekîr Şahînî newe ra 19ê Kanûne de waştişê blokekerdişî kerd. DDB 6ê Çeleyî de no waştiş qebul kerd û hesabo ke seba partîye estbî yê hetkarîya xezîneyî bloke kerd.

 

Qerar çapemenîya hetgir de ame serwîskerdiş

 

Qerar avûkatanê endamê Komsîyonê Huqûqî yê HDPyî rê nêame teblîgkerdiş. Qerar sere de çapemenîya hetgirî yê îqtîdarî de ame serwîskerdiş. No qerar hetê xeylê kesan ra bî sebebê reaksîyonan û netîceyê de bi taybetî wayîrvejîyayîşêk HDPyî vejîya raşte.

 

‘Wazenê HDPyî tasfiye bikerî’

 

Parlamentera HDPyî ya Agirî Dîlan Dîrayet Taşdemîre derheqê qerarê DDByî ke seba partîya înan dabî de ercnayîşan kerd û da zanayîş ke AKP-MHP îmza eştî bêhuqûqîyêk newe. Dîlane wina dewam kerd: “Verê cû muracatî di reyan ameyî redkerdiş. La na reye bi zaf raydayîşî ame qebulkerdiş. Hemverê dadgeranê ke nê prosesî de ca girewtî de zextêk cidî pê ardî. Qerarê ke ameyî dayîş bi tu hawayî huqûqî nîyê, qanûnî nîyê. AKP-MHP ver bi weçînayîşî hewl dano ke HDPyî tasfiye bikerê. Wazenê rolê HDPyî sîyasetî de kêmî bikerê. Konsepte tasfîyekerdişî kerdî dewre. Bi no zî tepiştiş, destbednkerdiş, operasyon û dewayanê kumpasî pê anê.”

 

‘Ma têkoşîn kenê'

 

Dîlane sewbîna dîyar kerd ke planê hemverê HDPyî de Qesre de yenê organîzekerdiş û wina vat: "7ê hezîrana 2015ine ra heta nika pêro planê înan veng vejîyayî. Hesabê înan sere nêşi. Partîya ma, şar, ciwan, hêzê demokrasî, cinî her ke şî xurt bî û ameyî nê rojan. Dorê partîya ma de bî yew. Hemverê partîya ma de hew wext teda û hêriş pê ardî. 7ê Hezîrane ra dima yewin rey ma hetkarîya dewlete girewt. Ma sey înan bi rant sîyaset nêkenê. Ma bedel danê û têkoşîn kenê. Ma pêro prosesî bi artêşa zerrîwaşteyan kenê. La AKP nê fam nêkeno. Demo seba înan yene padayîş, ma vînenê ke ê yewbînan rê se bikerê. Ma zanê ke o sîyaset senîn organîze kenê. La ma wina nêxebityenê. Ma bi têkoşînê xo estê. Nê qerarê wina tesîr serê ma de nêkenê."

 

‘Qerar xîleyê weçînayîşî yo'

 

Dîlane da zanayîş ke îqtîdar hewl dano bi nê qerarî mesaj bido 6 mîlyonî weçînitoxê  HDPyî û wina vat: "Tu kes nêeşkeno îdia bikero ke Tirkîya de weçînayîşêk adîlane, têduşt û demokratîk pê yeno. AKP-MHP pêro çimeyê welatî seba xo şuxulnenê. La paştdayîşê ke heqê ma yê qanûnî yo, bi talîmatê înan yeno astengkerdiş. Gelo nika ma eşkenê qalê weçînayîşêk demokratîkî bikerê. No qerar xîleyê weçînayîşî yo."

 

‘Ganî bi HDPyî reyde paştdayîş bibo'

 

Dîlane peynîya qiseykerdişê xo de nê vat: "Îqtîdar, wayîrê fehmê xespî û binpaykerdişî yo. Tena weçînitoxê HDPyî’, cinî û ciwanî, ganî pêro kesê ke wazenê Tirkîya biba welatêk demokratîk, bi HDPyî reyde paştdayîşî de bê. Bê HDPyî nê welatî de do çîyêk nêvuryo. Seba cuyêke têduşt, bi HDPyî reyde do serkewtiş pê bêro."