RIHA - Baroyê Qersî, Xelata Edaletî ya serra 2022ine da Emîne Şenyaşara ke 669 rojî yo waştişê edaletî kena.

 

Merdim û pawitoxê Parlamenterê AKPyî yê Rihayî Îbrahîm Halîl Yildiz 14ê hezîrana serra 2018ine de Pirsûsê Rihayî de hêrişê keyeyê Şenyaşarî kerdî. Netîceyê hêrişî de mêrde û di lajê Emîne Şenyaşar ameyî qetilkerdiş. Emîne Şenyaşar û lajê ci Ferît Şenyaşar ke bi birîndarî qirkerdiş ra xelas bibi, 9ê adara serra 2021ine de vernîya Edliyeyê Rihayî de dest bi çalakiya Nobeta Edaletî kerdibî. Çalakiya keyeyî roja 669ine de zî dewam kerd. Keyeyî saetê serê sibayî de Pirsûs de ameye verê berê Edliyeyê Rihayî. Dima ra zî Serekê Baroyê Qersî Fettah Çapkurt û endamê Heyetê Îdarekarî şî serdayîşê keyeyî. Sewbîna Serekê Baroyê Rihayî Abdullah Oncel, Hemserekê Şubeyê Komeleya Huqûqnasê seba Azadîye (OHD) yê Rihayî Halîl Oyke û xeylêk avûkatê bînî zî tewrê heyetî bî.

 

Serekê Baroyê Qersî Fettah Çapkurt da zanayîş ke seba paştdayîşê bi têkoşînê edaletî yê keyeyê Şenyaşarî reyde ameyê serdayîşî. Fettah, bi domdarî dîyar kerd ke sey Baroyê Qersî 2yê çeleyî 2023ine de qerar dayî ke Xelata Edaletî ya serra 2022yîne bidê keyeyê Şenyaşarî. Dewam de Fettah vatişê Serekkomarê AKPyî Tayyîp Erdoganî ke vatêne; “Dewletêka edalet pê nêaro sey bînayêkê rijnaye mecbûrê rijnayîşî ya” ard vîr û wina vat: “No vatiş, tespîtêk rast o. Têkoşînê edaletî yê keyeyê Şenyaşarî hewldayîşêk yan zî gamêke seba rijnayîşê bînaya rijnayeye la seba bînaya rijyaye la seba xurtkerdişê ci yo. Ma do her wext keyeyî reyde bê û heta peynîye paştdayîş bidê têkoşînê edaletî yê dayika Emîne.” 

 

Dimayê qiseykerdişî, Fettah plaketê Xelata Edaletî û peykerê Themîs ke sembolê edaletî yo diyarî Emîne Şenyaşare rê kerd. Emîne Şenyaşar zî seba paştdayîşî spasiya beşdaran kerd û waşt ke kiştoxî bêrê muhakemekerdiş.

 

Dimara zî Serekê Baroyê Rihayî Abdullah Oncel qisey kerd û wina vat: “Ez spasiyê xo pêşkeşê dayika Emîne kena ke bîya sembolê cigêrayîşê edaletî. Sewbîna spasiya heme rêxistinê komelê sivîl, partiyê siyasî û Serekê Baroyê Qersî û endamê Heyetê Îdarekarî kena ke tu wext dayika Emîne bi tena nêverdayî. Ma do tu wext dayika Emîne tena nêverdê.”

 

 

Serekê Baroyê Qersî û endamê Heyetê Îdarekar heta demêk bi keyeyî reyde roniştî û dima ra zî şî.