Gulîstan Dursun

 

STENBOL - Cinîyî serra 2023î bi çalakîyanê ‘Serewedarnayîşê cinîyan do bibedelîyo’ pêşwazî kenî û vanê: “Ma têkoşînê xo serra 2023î de zî gird bikerî û ma çalakîya xo ya yewine pê bîyarî. 8ê çeleyî de saet 15î de ma her kesî dawetê Kadikoyî kenî.”  

 

2022î de her cayê dinya de hemverê têkoşînê cinîyan de hêrişêk gird pê ame. La vera heme hêrişan cinîyan fek têkoşînê x ora vera nêdayî û 2022î de raşteyan nêteriknayî. Bi taybetî Îran de bi serkêşîya cinîyan felsefeya ‘Jin Jiyan Azadî’ vejîya raşte û xoverdayîşê cinîyan heme dinya de ame hîskerdiş. Na çarçewa de qerardarîya têkoşînî serra 2023î de zî dewam keno.

 

Raşteyan de cewab yeno dayîş

 

Cinî bi çalakîyan 2023î pêşwazî kerdî. Bi vengdayîşê Cinî Pîya bi Hêzî (KBG) 8ê çeleyî de Rihtimê Kadikoyî yê Îskeleyê Beşîktaşî de saet 15.00î de do çalakîya yewine ya emserrî bi siloganê ‘Ma 2023î bi çalakîyan pêşwazî kenî, do serewedarnayîşê cinîyan bibedelîyo’ pê bêra. 

 

Aktîvîsta Tevgerê Cinîyanê Azadan (TJA) Eylem Saruca û Sereka Komeleya Wextê Cinîye Dîlek Başalane derheqê muhîmîya têkoşînê cinîyan de ercnayîşan kerd.

 

Cinîyan sey muxalefetê yewine vînenî

 

Aktîvîsta TJAye Eylem Sarucaye da zanayîş ke serranê peyênan de hemverê cinîya kurde de polîtîkaya şîdetî yena rayraberdiş û wina vat: “Wext yeno yenê qetilkerdiş, wext yeno yenê tepiştiş. No zî mojneno ke dewlete bi polîtîkayanê taybetan nizdîyê cinîya kurde bena. Dewlete cinîyan sey muxalefetê esasî vînena. Bi pêroyî cinîyan ser de şîdet pê ana. Bê şik tewr zêde zextan serê cinîya kurde de pê ana. Qetilkerdişê edîtora jîneolojîye Nagîhan Akarsele, operasyonê hemverê aktîvîstanê TJAye, tepiştişê xeylê cinîyan polîtîkaya şîdetî mojneno.”

 

Do hêriş zêde bibo

 

Eyleme dîyar kerd ke bi hawayêk xurt cewab dîyeno hêrişanê ke yenê kerdiş û vat: “Sloganê ‘Jin jiyan azadî’ sloganêk netewî yo û serê ziwanê her kesî de yo. Têkoşînê cinîya kurde vejîyayo zîrwe. No têkoşîn do bi têgêrayîşê cinîyan bajaramê Rojawanê Tirkîya de bibo yew û 2023î de do dewam bikero. Ma dekewtî prosesêk weçînayîşî û asîyeno ke îqtîdar do hîna zêde hêriş bikero. La cinî do 2023î de zî têkoşîn mîyan de bî û ma çalakîya xo ya yewine ya serra 2023î do 8ê çeleyî de Kadikoyî de saet 15.00î de pê bîyarî û her kesî pawenê çalakî.”

 

‘Têkoşîno hempar’

 

Sereka Komeleya Wextê Cinîye Dîlek Başalane bale ant serê serra 2022î û wina vat: “Ma her tim têgêrayîş mîyan de bî. Ma hemverê hêrişan û seba destkewtişê cinîyan têkoşîn kenî. Ma do serra 2023î de zî têkoşîn mîyan de bî û raşteyan de bî. Ma çalakîya xo ya yewine ya 2023î Kadikoyî de pê anî. Serra 2023î seba ma heme kesan muhîm a. Ma dekewtî serrêk newe ya ke ma eşkenê têkoşînê xo yê hemparî gird bikerî. Coka ra ma sey Cinî Pîya bi Hêzî ganî raşteyan de bî. Ma 8ê çeleyî de Kadikoyî de yî. Na çalakîye seba ma xeylê muhîm a. Sloganê ‘Serewedarnayîşê cinî do bibedelîyo’ seba ma manayêk gird gêno û muhîm o. Çimkî bedelnayîş ercayeyeê vatişî yo. Ma wazenê ke têkoşîn û vatişê cinîyan bi tesîr bo û ma bibî serkêşê nê çîyî.”