Sema Çaglak

 

SÊRT – Dayîka di tepişteyanê nêweşan Leyla Taşçiye da zanayîş ke tepişte terke mergî yenê kerdiş û wina vat: “Nêweşîya kênaya mi zerrî ra ya. Rewşa aye her ke şina xirab bena û tehlukeyin bena. Zerrîya aye her ke şina gird û hîra bena. Eke neqîlê zerrî nêba do xeylê erê biba.”

 

Tepişteyan ser de polîtîkayê tewir bi tewirî yenê rayraberdiş. Hemverê tepişteyan de muameleye kêfî yenê kerdiş, tepişteyê nêweşî nînê dermankerdiş û tepişte terke mergî yenê kerdiş. Sewbîna xeylê tepişteyê ke cezaya înan qedîyaya bi bahaneyanê cîyayan înfazê înan yeno vêşnayîş û tehlîyekerdişê înan yeno astengkerdiş. 

 

Leyla Taşçiya ke Sêrtî de cuyena dayîka di tepişteyanê nêweşan a. Nê tepişteyan ra yew Kasim Taşçiyo ke 7 serrî yo tepişte yo û nika Zîndanê Êlihî yê Beşirî de yeno tepiştiş o. Gulê Taşçiye zî Zîndanê Amedî de tepişte ya û aye rê 5 serrî ceza ameya birnayîş. Nêweşîya Gulêye ya zerrî esta. Dayîka aye Leyla Taşçiye da zanayîş ke eke tedawîya aye nêra kerdiş û neqlê zerrî nêra kerdiş do seba aye erê bibo.”

 

‘Dewleta tirke heqeratê tepişteyan kena’

 

Leylaye ard ziwan ke serê tepişteyan de zilmêk gird yeno kerdiş û heme heqanê xo yê esasî ra bêpar yenê verdayîş. Leylaye wina vat: “Xeylê tepişteyî verê tehlîyekerdişî de yî. cezaya înan qedîyaya la înfazê înan yeno vêşnayîş. No zilm gird o. Dewleta tirke heqaret bi tepişteyan kena. Tutê ma nêweş ê û seba weşîya înan mîyanê hewldayîşan de yî. îmkanê ma yê pêvînayîşî çinî yo. Dima ra gama ke tepişte dinyaya xo bedelnenî vanê ke tepişte xo kişto. Her kes zî zano ke çîyanê winasîyan nêkenî. Ma tena azadîya tutê xo wazenî. Ma heqaret û zilmê înan qebul nêkenî.”

 

‘Eke neqîlê zerrî nêba do zerrîya aye vindera’

 

Leylaye dîyar kerd ke cayê tepişteyanê nêweşan zîndan nîyo û dîyar kerd ke ganî bilez tepişteyê nêweşî bêrî dermankerdiş. Leylaye vat: “Nêweşîya kênaya mi zerrî ra ya. Ganî Anqara de tedawîya aye bêra kerdiş. Ganî zîndan de nê. Rewşa aye her ke şina xirab bena û tehlukeyin bena. Gulê nêweş a, gama ke ma şinê verê aye ma nêzanê ke se vajî. Zerrîya aye gird bena û hîra bena. Vanê eke neqlê zerrî nêvirazîya do zerrîya aye vindera. Aye ewja û ez zî tîya de ya. Dejê aye vera hewn nêkeweno çimanê mi û ez tim lorînena. Ma rê vanê ke ma tedawîya aye kenî, aye zûrî kena. La ê zûrî kenî û paweyê mergê aye yî.”

 

‘Paweyê mergê aye yî’

 

Leylaye ard ziwan ke dewlete paweyê mergê tepişteyan a û wina dwam kerd: “Xeylê tepişteyê nêweşî estî ke şert û mercê înan goreyê mendişê zîndanî îyo. Çime tepişteyan xira benî, seqet manenî û ya zî nêweşîyê binî înan de virazîyenî. Dima ra dinyaya xo bedelnenî û vanê ke bêrêne cenazeya xo bigêrêne. Acaba qey wextê xo de tedawîya înan nîna kerdiş û paweyê mergê înan yeno vindetiş. Tu zerrîya dayîkêk nêwedarneno ke domanê înan zîndanan de dinyaya xo bibedelnî. Ê merdeyan ra zî tersenî. Tepişteyê nêweşan ra tersenî û îradeya tepişteyan ra tersenî.”

 

‘Ganî vengê keyeyê tepişteyan bêro eşnawitiş’

 

Leylaye qiseykerdişê xo de bale ant Nobeta Edaletî ya ke merdime tepişteyan dayî testpêkediş ser û vat: “Lajê mi zî enerjîya ci xeylê kêmî bena. Nêeşkeno payan ser de vindero û her ke şino ci de nêweşîyê neweyî vejîyenî. Xeylê keyeyê tepişteyan seba rewşa tepişteyanê nêweşan Nobeta Edaletî dabî dest pêkerdiş. Ez zî înan silam kena û xoverdayîşê înan bimbarek kena. Ganî keyeyê tepişteyan heme bajaran de dest bi çalakîyan bikerdêne û bibayêne vengê tepişteyan. Keyeyê tepişteyan vera heme hêriş, şert û mercan de reyna nobeta xo girewtî. Ganî vengê keyeyan bêro eşnawitiş. Xora dewlete nêwazena bieşnawa la qet bêno heme komel ganî paştî bido keyeyan. Ma do heme keyeyî veng bidî vengê yewbînan û hemverê zilmî de bivejîyî.” 

‘Ganî seba tepişteyan têkoşînêk gird bibo’

Leylaye qiseykerdişê xo yê peyênan de ard ziwan ke ganî heme kesî rewşa tepişteyan de hessas bibî û nê çîyan vat: “Domanê ma binê tecrîdêk gird de yî. Serê keyeyan de tecrîdêk gird yeno kerdiş û heqaret bi makenî. Gama ke ma çîyêk eksê zilmî vajî ma yenê tehdîtkerdiş. Ma rê vanê eke şima çîyêk vajî ma do nêverdî şima domananê xo bivînî. Ganî şarê ma qaseyo ke destê înan ra bêro têkoşîn bikero û bibo vengê tepişteyan.”