ANQARA - Wekîlê HDPyî vera tecrîdê Îmraliyî Nobeta Edaletî de yê. Wekîlan pare kerd ke têkoşînê înan do vera tecrîdî her ca de dewam bikero.

 

Wekîlê HDPyî vera tecrîdê Rayberê PKKyî Abdullah Ocalanî 11 rojî yo nobeta edaletî gênê. Wekîlê HDPyî Erdal Aydemîr, Ayşe Surucu, Îmam Taşçier, Huseyîn Kaçmaz, Hasan Ozguneş, Abdullah Koç, Mahmût Togrûl, Nusrettîn Maçîn, Fatma Kurtulan, Mûrat Sarisaç, Kemal Bulbul û Celadet Gaydali ver bi Wezîrîya Edaletî şîyî û înan tîya de eşkerayîyêke daye.

 

Wekîlê HDPyî yê Riha Nusrettîn Maçînî eşkerayîye wende û pare kerd ke Îmrali de huqûq nêno caardene û vat: ''Tecrîdê Îmraliyî nika verê Meclîsî de vera ma yeno kerdene. Se beno wa bibo ganî Ocalan bieşko fikranê xo biresno şarî. Ma bêhuqûqîya Îmraliyî qebul nêkenê. Ê wazenê bi hêzê polîsan şarê kurdî bêveng bikerê. Ma ney qebul nêkenê. Ma bi tecrîd û neheqîyan kewenê seserra diyîne. Tecrîd yeno manaya bêhuqûqîye. Ma do her ca de, Meclîs de, kuçeyan de, kargehan de, taxa de, baxçeyan de û her cayê cuye de biqîrê û vera tecrîdî têbigêrê. Qet yew hêz nêeşkeno ma bêveng bikero.

 

Tecrîdê vera Birêz Ocalanî wedarnê. Peynîya kerdişanê keyfî û îşkenceyan bîyarê. Ma tepişteyanê nêweşan rê azadîye wazenê. Wa serra 2023yî biba serra azadîya tepişteyan û azadîya şarê kurdî.”