Zelal Tunç

 

WAN - Sitya Beytere camêrdo ke aye reyde zewecnaye bî ra 36 serran şîdeto sîstematîk dîye. Sityaye bi desan reyan gerre kerde la bi desan reyan bi qerarê bêtaqîbî na rewşe netîce girewt. La aye fek têkoşînê x ora vera nêdaye. Kerdoxî rê dewaya hewldayîşê qetilkerdişî ame akerdiş û kerdoxî rê 15 serran ceza ameye birnayîş. Sityaye dîyar kerd ke hemverê şîdetê camêrdî de fek têkoşînê x ora vera medêne.

 

Kurdistan û Tirkîya de şîdetê hemverê cinîyan bi her tewirî dewam keno. Cinî hemverê şîdetê camrêdî de raşteyan de reaksîyyonanê xo mojnenî. Pê xoverdayîşê cinîyan û reaksîyonê rayaumûmî kerdoxan rê kêm bo zî ceza yena birnayîş. Înan ra yew zî Faruk Beyterî yo ke netîceyê têkoşînê cinîyan de ci rê ceza ameye birnayîş.

 

Faruk Beyterî 36 serran şîdeto sîstematîk bi Sitya Beyterî kerd û tewr peynî hewl da ke aye qetil bikero. Derheqê kerdoxî de sûcê ‘hewldayîşê qetilkerdişê cinîye’ û ‘birîndarkerdişê pê çekî’ ra dewa ameye akerdiş. Dewa Mehkemaya Cezaya Girane ya Erdîşî de 28ê Kanûna 2022î de ameye dîyîş. Mehkema 15 serrî ceza da kerdoxî.

 

Sityaya ke cigêrayîşê edaletî de paştîdayîşêk gird domananê xo ra girewta heme çîyê ke cuyaya ajansê ma rê vat.

 

Şîdeto sîstematîk pê ardêne

 

Sityaye da zanayîş ke 19 serrîya xo de sey bedêlî Faruk Beyterî reyde ameya zewecnayîş û hema rojanê ewilan yê zewaca xo de şîdet dest pêkerdo û wina vat: “Keyeyê kerdoxî zî şîdet bi mi kerdêne. Pîyê ci zî şîdet bi mi kerdêne. Pîyê ci reyêk derb da sereye mi ro û aye roja ra nata sereye mi dejeno. Ewil ma keyeyî reyde cuyayêne. Şîdetê keyeyî vera Faruk Beyterî vejîya tebere bajarî. Mi zî domananê xo girewt û taxe de komirxaneyê mektebî de ca bîya. Dima ra îdareyê keyeyî vera reyna şîya verê keyeyî. Mecburî seba ke biracinîya mi waya mêrdeyê mi bî, mi vengê xo nêkerd û mecbur menda ke agêra verê keyeyî.” 

 

Her gerre bênetîce mend

 

Sityaye dîyar kerd ke her gerreyê aye bênetîce mend û wina dewam kerd: “7 domanê mi estî. Yê tewr şenik 15 serrî yo. Şîdeto ke mi dî vera 6 reyan muracatê dozgerîye kerd. Raporê mi yê derbkerdişî estî. Mile mi de xisar esto. Vera hende çîyan reyna zî her gerreyê mi bênetîce mend. Keyeyî kewtêne mabenê ma. Reyna ez mecbur mendêne şêra keye. La şîdetê ci zirarêk gird da mi.diranê mi pêro şikiteyî. Vatêne qisey meke, bêveng bimane û mi tehdît kerdêne. Tena mi nê domananê mi zî kuyayêne. Çîyê ke ame sereye mi ez bi serran vaja zî nêqedîyeno.” 

 

‘Wa bêro tepiştiş’

 

Sityaye tewr peynî vat ke kerdox ewil ame tepiştiş la dima ra serbest ame verdayîş û bi hewldayîşê avûkatan qerarê kelemçeyê elektronîk vejîya û vat: “La mi fek cigêrayîşê edaletî ra vera nêda. Kênaya mi paştîdayîşêk gird da mi. Roniştişê 28ê Kanûne de 15 serrî ceza dîya ci. Vera nê qerarî kerdox hema zî nêameyo tepiştiş. Kerdox yeno verê berê ma zî. Ganî bi lez borê tepiştiş. Ez veng dana cinîyan. Wa nêtersî, gerre bikerî, têkoşîn bidî. Cezaya ke ameya dayîş seba cinîyan bî umud. Wa cinîyî şîdetî da xo bixelisnî.”