SÊRT – Perwarî de tuta 13 serrî 2 serrî tecawuzo sîstematîkî reyde rî bi rî mende. Îfadeyê tute bê pedagog ame girewtiş û keyeyê tute vengê paştîdayîşî kerd û dîyar kerd ke sucdar merdimê înan o û hema zî teber de yo.

 

Dewêka girêdayê qezaya Perwarî ya Sêrtî de, tutêke 2 serrî bi hêrişê cinsî yê sîstematîkî yê Huseyîn Tapar (65) û Hamît Şener (35) reyde rî bi rî mende. Dimayê ke serebût vejîya werte, keyeyê tute şi qereqole û gerre kerd. Dimayê gerrekerdişî 8ê teşrîna peyêne de derheqê herdi hêrişkaran de dewa ameye akerdiş. La pêwa vengê qeydkerde û îfadeyan zî 11ê teşrîna peyêne de hetê dozgerî ra qerarê bêtaqîbkerdişê derheqê dewa de ame dayîş.

 

Îtîrazê seba qerarê bêtaqîbî yê dosyaye ame qebulkerdiş

 

Serewekîla Partîya Demokratîke ya Şaran (HDP) û parlementera Sêrtî Meral Daniş Beştaşe 19ê Kanûne de hedîse berdbî rojeva Meclîsî û pêşnîyazname dabî. Sewbîna avûkatê keyeyê zî seba qerarê bêtaqîbî îtîraz kerdbî. Pêşnîyaznameyê keyeyê tute ra dima seba îfadegirewtişî hetê qereqolê Perwarî ra ame vendayîş. Badê 3 rojan Dozgerîya Sêrtî îtîrazê seba bêtaqîbkerdişê dosyaye qebul kerd.

 

Tute kerdî binê pawitişî

22ê Kanûne de tute wedarîyaye nêweşxane û seba dozgerîye raporê travmayî amebî waştiş. Dima ra ame zanayîş ke tute binê pawitişî de yena girewtiş.

 

Yeno îdîakerdiş ke pê pere serê tecawuzî yeno girewtiş

 

Goreyê îdîayan yeno vatiş ke H.Tapar pere dayo H. Şenerî ke îfadeyê xo de nameyê H. Taparî vajo. 

 

‘Wirdî kerdoxî zî ortaxê yewbînan î’

 

Keyeyê tute derheqê babete de qisey kerd. Pîyê tute da zanayîş ke wirdî kerdoxî ortaxê yewbînan ê û wina qisey kerd: “H. Tapar 2 serrî yo ke ameyêne keyeyê ma û keyeyê ma de mendêne. No hamnanî vatêne ez do tîya de xo rê yew bax û baxçe viraza. Ma zî hetkarîya ci kerdêne. Ez ge-ge dewe de nêmendêne. Tuta mi ci rê werd berdêne û hetkarîya ci kerdêne. Baxçeyê H. Şenerî zî kişta baxçeyê ci de mendêne. Gama ke H. Taparî destdergê bi kênaya mi keno H. Şenerî zî vîneno. No îstîsmar û destdergê keyeyê H. Taparî rê ame vatiş la kesêk bawer nêkerd. Dima ra H. Şenerî zî bi tehdîtê mergî dersdergê bi kênaya mi keno û îstîsmarî reyde rî bi rî manena. Wirdî zî ortaxê yewbînan.”

 

‘Îfadeyê yewine bê pedagog ame girewtiş’

 

Pîyê tute dewamê qiseykerdişê xo de ard ziwan ke tuta aye ser de travmayêk gird virazîya yo û demêk derg nêeşkaya xo îfade bikera û wina qedêna: “Dima ke ma hedîse eşnawit waya mi Mêrsîn de û mi zî Perwarî de muracatê sucî kerd. Ma şîyî qereqol û îfade da. Îfadeyê kênaya mi zî bê pedagogî ameyo girewtiş. Tersî vera tena eşkeye nameyê înan bida. Dima ra îfadeyê wirdî kesan girewtî û tehqîqat dîya dest pêkerdiş la bado ke aşmêk derbaz bî qerarê bêtaqîbî dîya. Ma zî na rewşe ra dima avukata xo reyde qisey kerd. Ma reyna şîyî qereqol û îfade da. Kênaya mi tersî vera nêeşkayêne îfade bida. Aye wext ma şîyî Sêrtî û ewja de îfadeyê aye binê çimdarîya pedagogî de ame girewtiş. Ma wazenê ke wirdî zî bêrî tepiştiş. Heta peynî ma do heqanê kênaya xo bipawî. Heta ke nê kesş nêrî tepiştiş ma do pey dewaye de bî.”