Marta Somek

 

STENBOL - Endama Cinî Pîya Xurt î Nevruz Tugçeye da zanayîş ke cinîyan serra 2022î de raşteyan nêteriknayî û 2023î zî bi çalakîyan pêşwazî kerdî û vat: “Ma veng dane heme cinîyan ke 8ê Çeleyî de kişta ma de raşteyan de bibî.”

 

Şîdet û hêrişê camêrd-dewlet-polîsî yê hemverê têkoşînê cinîya rêxistinkerde serra 2022î de bê maben dewam kerd. Çalakîyê cinîyan bi bahaneyê qedexeyan ameyî astengkerdiş û polîsî raşteyan de hemverê cinîyan de şîdet, îşkence, derb, tehdît û hewldayîşê qetilkerdişî pê ard. Nimuneya peynî 25ê Teşrîna Peyêne de pê ame. Xeylê raşteyê Taksîmî de polîsan şîdet bi cinîyê ke çalakî pê ardî kerd.

 

Cinîyan bi xoverdayîşî cewab da

 

Cinîyan 2022î de bi xoverdayîş cewab da şîdet, îşkenceyê camêrd-dewlet-polîsî. Cinîyê ke qetilekrdişî reyde rî bi rî mendî, cinî û domanê ke şîdet dîyî raşteyan de xover dayî. Cinî bi çalakîyan serra 2023î pêşwazî kerdî. Bi vengdayîşê Cinî Pîya Xurtî (KBG) 8ê Çeleyî de Rihtimê Kadikoyî de verê Îskeleya Beşîktaşî de saet 15.00î de do çalakîya yewine yê emserrî bi sloganê ‘Ma 2023î bi çalakîyan pêşwazî kesnî; Do serewedarnayîşê cinîyan bibedelîyo’ pê bîyara.

 

Endama KBGyî Nevruz Tugçe Ozçelîke têkoşînê cinîyan yê serra 2022 û 2023î ke senî pêşwazî bikerî ercnaye.

 

Vera hêrişan de do xeta têkoşînî dewam bikera

 

Tugçeye dîyar kerd ke serra 2022î bi xoverdayîş, têkoşîn û destkewtişan derbaz bî û netîceyê têkoşînan de ame girewtiş. Tugçeye wina vat: “Vera şîdetê camêrd-dewlete de ma do fek têkoşînê xo ra vera nêdî. Xeylê embazê ma ameyî tepiştiş la Aysel Tugluke zindan ra ameye vetiş. Nika seba weşîya aye agêra dest bi dermankerdişî kerda. Seba ma emserr 2022î bi têkoşînî derbaz bî. Îqtîdarî  her tim hêriş keno. Nika 2023î de babeta ke do desturê bingeyîn bêro rojeve esta. Ma do 2023î de zî têkoşînê xo dewam bikerî.”

 

Do 2023î bi çalakîyan pêşwazî bikerî

 

Tugçeye dewamê qiseykerdişê xo de da zanayîş ke cinî cuyêka zehmetin cuyena coka ra mecbura ke xover bida û vat: “Bi hêrişan nêeşkenê ma çinî bikerî. Ma têkoşînî ra fek vera nêdanî. Xeyanê ma cinîyan esto ke cuyêka bê şîdet biba. Seba nê xeyalî zî ma do têkoşîn bikerî. Ma do bi çalakîyan dest bi 2023î bikerî. Emserr seba Tirkîya serrêk krîtîk bî. Îqtîdar reyna seba ke bibo îqtîdar do beden û cuya ma bikero babeta bazarî. La ma do bi xoverdayîş cewab bidî.”

 

Seba çalakiyan veng ame kerdiş

 

Tugçeye tewr peynî ard ziwan ke Tirkîya de têgêrayîşê cinîyan serranê peyênan de xeylê aver şîyo û gird bîyo û wina qedênaye: “Ma her serre têkoşînê xo hîna gird kenî. Ma do 8ê Çeleyî de dest bi çalakîyanê xo bikerî. Na çalakîye de ma do cinîyan reyde vatişanê xo vajî. Ma do vengê ‘ma bi xoverdayîşî kewenê serra newe’ kenî. Serra newe de hêrişê cidî ma pawenî. La têgêrayîşê cinîyan her ke şino gird beno. Ma hewl danî veng û vatişanê xo biresnî cinîyanê Tirkîya. Ma veng bi heme cinîyan kenî ke 8ê Çeleyî de kişta ma de raşteyan de bibî.”