MERKEZÊ XEBERAN - Çalakîyê ke dimayê qetilkerdişê Jîna Emînî bajarê Îran û Rojhelatê Kurdistanî dest pêkerdibi, vizêr şan de zî dewam kerdî. Çalakîkeran hemverê polîtîkayanê teda û qetlîamî nêrazîbîyayîş mojna û hemverê hukmatî de sloganan berz kerdî.

 

Serewedaritişê bi rengê şorişî yê rojhelatê Kurdistanî û Îranî ke dimayê kiştişê Jîna Emînî dest pêkerdibi, bêmabên dewam keno. Welatijê ke bajarê Sineyê Rojhelatî de barîkat dayî ro, hemverê rejîmê Îranî de sloganan berz kerdî. Çalakîkeran xeylêk taxanê bajarî adir fînayî ta û venga şarî kerdî ke vejîyê kuçeyan. Kesê ke paştdayîş dayî çalakîkeran vejîyayî raşteyan û tedayê dewleta Îranî şermezar kerdî.

 

Çalakî seranserê welatî de dewam kenê

 

Xêrcê Rojhelat, xeylêk bajarê Îranî zî xeylêk welatî seba şermezarkerdişê polîtîkayê teda û  qetlîamî yê hukmatî de protesto kerdî. Goreyê agahîyê ke ameyê bidestkerdiş, Tehran, Rhodeser, Îsfehan, Samiram û xeylêk bajarê bînî de şar vejîya raşteyan û hemverê dewleta Îranî de sloganan berz kerdî.

 

Ame zanayîş ke demê çalakîyan de mabêne çalakîkeran û polîsan de pêrodayîş vejîyayo û xeylêk kesî birîndar bîyê.

 

Tehran de zî polîsan gazê hêsirrijnayîşî şuxulna û bi daran hêrişê çalakîkeran kerdî. derheqê hûmara birîndaranê bajarî de agahî nêameye girewtiş.