RIHA - Keyeyê Şenyaşarî bi Nobeta Edaletî dest bi serra neweyî kerd. Keyeyî serê hesabê xo yê medyaya dîjîtale de nê mesajî pare kerd: “Wa serra 2023ine biba serrêke wina ke heme welatî xo ci de azad û asayîş hîs bikerê. Azadî, asayîş û Aştî bi edalet mumkin o.”

 

Merdim û pawitoxê Parlamenterê AKPyî yê Rihayî Îbrahîm Halîl Yildiz 14ê hezîrana serra 2018ine de Pirsûsê Rihayî de hêrişê keyeyê Şenyaşarî kerd. Netîceyê hêrişî de mêrde û di lajê Emîne Şenyaşarî ameyî qetilkerdiş. Emîne Şenyaşar û lajê ci Ferît Şenyaşar ke bi birîndarî qirkerdişî ra xelas bîbî, 9ê adara serra 2021ine de vernîya Edliyeyê Rihayî dest bi çalakîya Nobeta Edaletî kerdibî. Çalakîya keyeyî roja 664ine de zî dewam kerd. Seba ke peynîya hewteyî ya edlîye padaye yo, keyeyî banê xo yê Pirsûsî dewam kerd. 

 

Derheqê çalakî de keyeyî serê hesabê xo yê medyaya dîjîtale de nê mesajî pare kerd: “Wa serra 2023ine biba serrêke wina ke pêro welatijî xo ci de azad û asayîş hîs bikerê. Azadî, asayîş û aştî bi edalet mumkin o. Tirkîyayêke bêedalet nêbena. Illa edalet, biisrar edalet.”