XERPÊT - Tepişteya bi nameyê Kiymet Yeşîlgoza 60 serrî ke Êlule 2022yîne de tahlîye bî, bi bahaneyê nêkewta heyet, reyke bîn ameye tepiştiş û dekewtişê  zîndanî de cigêrayîşê zitî ci rê ferz kerdî. Kiymete derheqê çîyê ciwîyaya de muracatê Baroyê Amedî û OHDyî kerd.

 

Komîsyonê Zîndanî yê Komeleya Huqûqnasên seba Azadîya (OHD) û Komîsyonê Zîndanan ê  Baroyê Amedî, şi serdayîşê Zîndanê Tîpê Tyê Xerpêtî. Serdayîşê avûkatan de ame musayîş ke zîndanê bi nameyê Kiymet Yeşîlgoza 60 serrî rê îşkence ameyo kerdiş û seba nê psîkolojîya Kiymete xira bîya.

 

Seba bikewa koxuşê bêhet zor ci rê ame kerdiş

 

Kiymete 23yê êlule 2022ine de zîndanê Tarsusî de tahlîye bena la dima ra bi bahaneyê nêvejîyaya reyna ameye tepiştiş. Ame vatiş ke do Kiymete 6 aşmî bînî tepişte bimana û demê newe kewena zîndan, cigêrayîşê zitî ci rê kenê, wazenê bikewa koxuşa xoserî. Seba ke nê qebûl nêkena, tehdîdê do 6 aşmî bînî tepişte bimana yeno kerdiş.

 

Kiymete derheqê problemê cuyaya de waştişname da Baroyê Amedî û OHDyî. Kiymete waştişnameyî de wina vat: "Ez 23yê êlula 2022yîne de zîndanê tahlîye bîya. 1ê kanûna 2022ine de serê Pirda Mezgîrtê Dêrsimî de kontrolê nasnameyî de wesayît ra ameya vetiş û destbendkerdiş. Şewêke nezaretxane de menda. 2yê kanûne de mi şirawitê zîndanê cinîyan ê Tîpê Tyê Xerpêtî. Cigêrayîşê zitî mi rê ferz kerdî. Her çîyê mi vetî û vatî, hîrêê rey wurze û roşe. Ez derheqê înan de gerre kena. No caardişê nêînsanî yo, nêeşkeno bêro qebûlkerdiş.”

 

‘Bi aşmêke yo ez kabûs vînena'

 

Kiymete pêvînayîşê avûkatan de wina vat: "Ê vanê îffet la înan heta bincilkê dayîkêka 60 serrî vetî û vatî, hîrê rey wurze û roşe. No bêîfeti yo. Bi aşmêke yo ez kabus vînena. No bêrûmetî tu merdimî rê ganî nêro kerdiş."

 

Destdayî serê mektube

 

Avûkatan serê caardişê hemverê Kiymete de mektubêke derheqê rewşe de parlamentera HDPyî ya Mersînî Fatma Kurtulane rê şirawitî la mektube ameye desteserkerdiş.

 

Baro û OHDyî dîyar kerd ke do muracatê sucî bikerê û taqîbkerdoxê babete bibê.