MERKEZÊ XEBERAN - Derheqê hêrişa bi komî yê hemverê cinîya ciwane, 16 kesî ameyî destbendkerdiş û hêrişkarî sûcê xo îtîraf kerdê.

 

Taxa Hiwane ya Silêmaniyî de bi desan camêrdî vizêrî hêrişê cinîyêke ciwane kerdî û pehn dayî piro. Na hedîse bî sebebê reaksîyonê xeylêk kesan.

 

Derheqê hêrişê Verfekê Polîsê Silêmanîye Serkewt Ehmed eşkerayîye da û neql kerd ke serê hedîse ra 16 kesî ameyê destbendkerdiş û hemine sûcê xo itiraf kerdo. Serkewt Ehmedî vat, kesê ameyê destbendkerdiş heme şarê Silêmanîye yê û hîn kesê dîmenê hedîse serê medyaya dîjîtale de vila kerdî, destbend kerdê û hîn çekê sade yê mîyanê cebê înan ra ameyê desteserkerdiş.

 

Verfekê Hukmatê Herêma Kurdistanî Cotyar Adil zî dîyar kerd ke hêrişê serê cinîya ciwane ya Silêmanîye cayê şermezarî yo û ganî tewr lez demî de hemverê kerdoxê sucan tedbîrê huqûqî bêrê girewtiş û vat. "Na hedîse qet nîna qebûlkerdiş. Do hukmatê Herêma Kurdistanî hemverê her tewirî şîdetî û binpaykerdişê bi pêroyî yê heqê merdiman û heqê cinîyan vinderê. Ganî lezî hemverê kerdoxê nê sûcan tedbîrê huqûqî bêrê girewtiş.”