STENBOL - Sîyasetmedar û pawitoxê heqê merdiman dîyar kerdî ke Paris de qetilkerdişê 3 sîyasetmedaran tesaduf nîyo vatî: “Senaryo newe ra yeno awanerdiş û yeno kaykerdiş. Plan Anqara de ame viraştiş. La Kurdan sere nêrona. Kurdêk bimano zî do dewa dewam bikera. Ma do her tim payan ser de bî û xover bidî. Ma do her tim hesab bipersî.”

 

9ê Çeleyê 2013î de Paris de Sakîne Cansiz, Fîdan Dogan û Leyla Şaylemeze ameyî qetilkerdiş. Seba vîrarsişê înan 23ê Kanûne de Merkezê Kulturê Kurdan ê Ahmet Kayayî yê Parisî de amadekarî ameyî kerdiş. La hemverê Merkezê Kulturê Kurdan ê Ahmet Kayayî de suikast pê ame û netîceyê hêrişî de Têgêrayîşê Cinîyanê Kurd (TJK-E) Emîne Kara (Evîn Koyî), hunermmendê Kurd Mîr Perwer (Mehmet Şîrîn Aydin) û Abdurrahman Kizil ameyî qetilkerdiş. Reaksîyonê ke hêrişî ra dima dest pêkerdî dewam kenî.

 

Şar vejîya raşteyan

 

Badê qetlîyamî şarê Kurd û dostê înan vera hêrişê polîsan, vejîyayî raşteyan. Her cayê dinya ra zî reaksîyonî ameyî mojnayîş û bi desan protesto pê ameyî. Heto bîn de kiştox Wîllîam M.yo ke hirê Kurdan qetil kerdbî 24ê Kanûne de dermankerdişê doktorî de bi bahaneyê rewşa ci ya weşîye goreyê destbendkerdişî nîya wedarîya klînîkê psîkîyatrî. Badê reaksîyonanê şarî kiştox newe ra ame destbedkerdiş. Dima ra qerar ame girewtiş ke kerdox tepişte bêro muhakemekerdiş.

 

Sîyasetmedar û pawitoxê heqê merdiman reaksîyon mojnayî qetlîyamî û ajansê ma rê qisey kerdî.

 

‘Kurdêk bimano zî na dewa dewam kena’

 

Endama Komeleya Paştîdayîş û Hetkarîya ya bi Keyeyê ke Domananê Xo Vînî Kerdî ya Anadolu (ANYAKAY-DER) Nedret Kalkane derheqê babete de wina vat: “Çi heyfo ke seba Kurdan reyna rojêka sîya pê ameye. 9ê Çeleyî de Sakîne Cansiz ameye qetilkerdiş. 10 serrî derbaz bibî reyna qetlîyam pê ame. Hema şarê Kurd nê qetlîyamî xo vîta nêkerdbî ke yewna qetlîyam virazîya. Bi zanayîş Kurd û cinî yenê qetilkerdiş. Destê lêşinî serê Kurdan de xo nêdanî kişte. No qetlîyam plankerde bî. Vanê ke ‘kiştox delu yo, çîyêk nêzano’. Çîyêk winasî çinî yo. No merdimî Anqara ra şirawitî û plankerde bî. La ganî baş bêro zanayîş ke Kurd sere nêronenî. Kurd do her tim payan ser de bî. Kurdêk zî bimano na dewa deam kena. Ma do cewabê nê hêrişan bidî. Kurdî mergî ra nêtersenî. Kurdan bi mergî nêeşkenê biqedînî.”

 

‘Ma do her tim serê payan de bê û xo ver bidê’

 

Nedrete dewamê qiseykerdişê xo de bale ant serê xoverdayîşê şarê Kurdî û wina qedêna: “Eke ma xo ver nêdê, do ma keyeyê ma de qetil bikerê. êdî tehemulê ma cinîyan nêmendo. Hêrsê ma her ke şino zêde beno. Ganî ma êdî çîyêk bikerê. Dişminê ma her cayî de yê. Ganî seba nê ma keyeyê xo de nênêşnê ro. Ganî ma vejîyê kuçeyan. Ewropa de zî eynî lêşinî esto. Kurdî hedef de yê. Tehemulê înan çin o. Tedayan partîya ma rê sîyasetmedarê ma yê ciwan û cinîyan rê kenê. La ma her ke şinê zêde benê. Ê xo xapênenê. Ma do her tim xo ver bidê.”

 

‘Dewletan reyna şikdar pawit’

 

Hemsereka HDPyî ya Bakirkoyî Gonca Yangoz zî dîyar kerd ke têkoşînê cinîyan her ke şino girs beno û wina vat: “Qirkerdişê 10 serrî verê ame ciwîyayîş, Ewro reyna ame ciwîyayîş. Senaryo newe ra ameye nuştiş û yena kaykerdiş. Şikdarî yenê pawitiş. Dewlete şikdaran pawena. Heta şikdarî nêrê vînayîş ma do hesab bipersê. Ma do têkoşînê xo dewam bikerê.”

 

10 serrî dima eynî kuçe: Tesaduf nîyo

 

Endama Heyetê Îdarekarîyê Merkezî (MYK) ya HDPyî Elîf Bulut zî wina vat: “10 serrî verê Sakîne Cansiz ê ameyî qetilerdiş. La reyna ame ciwîyayîş. No tesaduf nîyo. 10 serrî verê hukmatê Fransa û selahîyetdarê ci  serê na hedîse padayî. La her çî nîşan dano ke no  tesaduf nîyo. Selahîyetdarê Fransayî vatî, ‘ma mudaxale kerd’ la bi mudaxaleyê welatijan şikdar ame vindarnayîş. No qirkerdiş tena bi nîjadperestî nîno vatiş. Ganî peyperdeyê nê bêro eşkerakerdiş. Ganî her kes kuçeyan de bo.”