RIHA - Çalakîya "Nobeta Edaletî" ya keyeyê Şenyaşarî 661 rojî yo dewam kena. Serekê TTByî Erînç Sagkan serdayîşê keyeyî kerd û vat: “Ganî muhakemeyêkê ke wijdanê cîstîmlakî zî pê rehet bibo û zelal bêro kerdiş.”

 

Merdim û pawitoxê Parlamenterê AKPyî Îbrahîm Halîl Yildiz 14ê hezîrana serra 2018ine de Pirsûsê Rihayî de hêrişê keyeyê Şenyaşarî kerd. Netîceyê hêrişî de mêrde û di lajê dayîka Emîne Şenyaşarî ameyî qetilkerdiş. Emîne Şenyaşar û lajê ci Ferît Şenyaşar ke qirkerdişê bi birîndarî xelas bîbî, 9ê adara 2021ine de vernîya Edliyeyê Rihayî dest bi Nobeta Edaletî kerdibî. Çalakîya keyeyî roja 661ine de zî vernîya Edliyeyê Rihayî de dewam kerd.

 

Serekê Yewîya Baroyê Tirkîya (TTB) Erînç Sagkan ame serdayîşê keye, keyeyî cayê çalakîya pankartê “Nobeta Edaletî ya hemverê hiqûqê serdestan” amebî daliqnayîş. Sewbîna Serekê Baroyê Rihayî Abdullah Oncel zî bi Erînç reyde ame cayê nobete. Erînç bi Ferît û Emîne Şenyaşar reyde pêvînayîş kerd û derheqê prosesê hukmî de  agahî girewtî û keyeyî goşdarî kerd.

 

Dima ra zî Erînçî qiseykerdişêk kerd û vat ke serrêke verê zî amebi serdayîşê keyeyî û wina vat: “Demê ma ameyî nê cayî bi rastî zî qîrîyayîşêk pîlî yê edaletî estbi. Nobeta Edaletî ke tut û mêrdeyê dayîkêk ameyê qetilkerdiş dewam kerdêne û baroyî zî paştdayîş dayîne estbî. Tîya dayîkêke esta ke seba edaletî qîrena. Ganî merdim nê qîrayîşî bieşnawo. Eşnawitişê nê qîrayîşî zî tena bi muhakemekerdişêk adîklene beno. Çîyo ke ganî bêro kerdiş zaf asan o. Îstînafî dosyaya ewilî xira kerda û qerar da ke ganî pîya bêrê kerdiş. Ganî muhakemeyêk ke wijdanê îstîmlakî zî pê rehet bibo û zelal bêro kerdiş.”