ANQARA - Îtirazê seba 9 rojnamegerê ke bi 2 aşmî yo girewtê, amebi kerdiş eynî roje de ame redkerdiş.

 

Mudûrê Karê Nuşteyî yê Ajansê Mezopotamyayî (MA) Dîren Yurtsever, muxabîranê MAyî Berîvan Altan, Ceylan Şahînlî, Emrûllah Acar, Selman Guzelyuz, Denîz Nazlim û Hakan Yalçin û muxabiranê JINNEWSî Habîbe Eren û Oznûr Deger netîceyê cipersayîşê Serdozgerîya Komare ya Anqarayî de, seba xebatê xo yê rojnamegerî, 25 teşrîna verêne de ameyî destbendkerdiş û 29ê teşrîna verêne de zî ameyî tepiştiş. Rojnamegerî bi di aşmî yo Zîndanê Sîncanî de yenê tepiştiş û îdîanameyê înan hema nêameyo amadekerdiş.

 

Goreyê xebera Ajansê Mezopotamyayî (MA) Avûkatê rojnamegeran 3yê teşrîna peyêne de hemverê tepiştişî îtîraz kerdî la nê îtîrazî heta 9ê teşrîna peyêne zî nêameyî ercnayîş. 18ê teşrîna peyêne de bê ke îtîraz bêrê ercnayîş û bê avûkatan karûbarê ercnayîşê ame kerdiş. Ame dîyarkerdiş ke waştişnameyê îtîrazî seba destûrê dozgerî nêameyo ercnayîş û vejîya werte ke dosya zî Dadgeriya Cezayê Sulhî ra nêameya şirawitiş. Na rewşe bi hawayêke fekî avûkatan rê ameye neqlkerdiş. Avûkatan hemverê na rewşe de 26ê teşrîna peyêne de reyna îtîraz kerdî. 

 

Îtirazê seba tepiştişê 9 rojnamegeran ame kerdiş eynî roje de ame redkerdiş

 

Qerarê waştişnameyî ke 9ê kanûne de amebi ercnayîş, 23yê kanûne de ame dayîş. Hem îtîrazê hemverê qerarê girewtişî û hem zî hemverê rewşa girewte ameyî vindarnayîş. Eynî roje de 72îne Dadgeha Cezayê Pêroyî rê ame şawitiş. Dadgehe 13ê kanûne de bi di qerarê cîya ra vat ke qerarê 8ine Dadgerîya Cezayê Sulhî yê Anqarayî de şaştîyêk nîyo û hem îtîrazê hemverê qerarê girewtişî û hem zî hemverê rewşa girewteyî bi eynî muhtewa û sebebî red kerd.

 

'Wazena ke îdianame bêro amadekerdiş û bêra veradayîş’

 

Avûkat Resûl Temûrî da zanayîş ke îtîrazê înan bi eynî muhtewayî û sebeban red kerdo û vat: “No çîyêk rastame nîyo. Serdozgerîya Komara ya Anqarayî 15ê kanûne seba dewamkerdişê rewşa tepiştebîyayîşê rojnamegeran mutalaa da. Demêk ke avûkatê rojnamegeran uca de nê 8ine Dadgeha Cezaya Sulhî 16ê kanûne de eynî sebeban qerar da ke rewşa tepiştişî dewam bikero. Rojnamegerî 16ê kanûne de bi rayîrê SEGBÎSî tewrê cigêrayîşî girewteyî bîyê. Dîyar kerdî ke wazenê pêwa avûkatanê xo cigêrayîşê vernî bibê. Vernê de Berîvan Altan pawitiş kerd û vat: “Mi hem dozgerî û hem zî dadgehe pawitişê xo hîra kerd. Ez tawanbariyê bîyaye qebûl nêkena, rojnameger a û xeberan taqîb kena. Adresê xo de ameye destbendkerdiş. Seba xebatê xo yê rojnamegerî yena muhakemekerdiş. Wazena ke îdianame bêro amadekerdiş û bêra veradayîş.”

 

‘Ez rojnameger a û do karê xo dewam bikera’ 

 

Ceylan Şahînlî zî vat; “Ez rojnameger a û do karê xo dewam bikera.” Dîren Yurtsever zî reaksîyon mojna serê nimitişê dosya û wina vat: “Parekerdişê ma û qiseykerdişê ma sey delîl ameyê mojnayîş. Derheqê ma de delîlêk somut çin o. Bi 8 serrî yo ez rojnamegerî kena û mi xeylêk xeberî viraştî. Ez seba xebatanê xo yê rojnamegerî yena muhakemekerdiş. Wazena bêra veradayîş.”

 

‘Delîlêk somut çin o’

 

Rojnameger Oznûr Degere zî vat, înan heta nika xeylêk xeberî viraştê, xelatan girewtê û dosyaya înan de delîlelêk somut çin o. Rojnamegere Habîbe Eren zî dîyar kerd ke nêzana seba çi yenê muhakemekerdiş û xeberê ke viraştê zî înkar nêkenê.

 

Denîz Nazlim vat ke xebatê sûcî yê ke tehdîd komelî bikero nêkerdê. Emrûllah Acar zî ard vîr ke par bi eynî tawanbarî amebî muhakemekerdiş la qerarê nêtaqîbkerdişî amebi dayîş. Hakan Yalçinî waşt ke bi şertê kontrolê edlî bêro veradayîş û Selman Guzelyuz zî vat ke bi hawayêk nêheq yenê destesererdiş.

 

Balkêş o ke dadgerîye qerarê xo bi bahaneyê “gumanê çinkerdişî delîlan” dayo.