ANQARA - Çalakîya parlamenterê HDPyî ya verê Wezaretê Edaletî yê hemverê tecrîdî de dewam keno. Çalakî de ame vatiş: “Bêvengîye hemparîya suc a. Ganî Wezaretê Edaletî lezabez cewab bido.”

 

Çalakîya parlamenteranê Partîya Demokratîke ya Şaran (HDP) yî verê Wezaretê Edalatî ke hemverê tecrîdkerdişê Rayberê PKKyî Abdullah Ocalanî de dayî destpêkerdiş, roja 6ine de ya. Verfekê HDPyî Ebrû Gunay, parlamentere Pero Dundar, Feleknas Ûca, Necdet Îpekyuz, Gulîstan Kiliç Koçyîgît, Mûazzez Orhan, Abdûllah Koç û Kemal Pekoz ver bi Wezaretê Edaletî de rayîra şî û dowîzê bi nuşteyê "Wa Îmraliyî de huqûq bi ca bêro" û "Tecrîd sûcê hemverê merdimayîye yo” wedarnayî. Parlamenterî verê Berê Dîkmenî yê Meclîsî de ameyî ablûqakerdiş û astengkerdiş.

 

Parlamenterê HDPyî yê Êlihî Necdet Îpekyuz diyar kerd ke ê hemverê tecrîdê Îmraliyî çalakiye kenê û dîyar kerd ke polîtîkayê şerî bi serran o benê sebebê dejê giranî. Necdetî qurbaniyê Qirkerdişê Roboskî ard vîr û dîyar kerd ke do qirkerdiş tu wext xo vîr ra nêkerê.

 

Necdetî dîyar kerd ke nêzdîyê 22 aşmî yo bi tu hawayî agahî Rayberê PKKyî Abdullah Ocalanî nîna girewtiş û vat, ganî hêzê komelî hemverê tecrîdî de bikewê mîyanê liv û tevgerî. Parlamenter Necdetî vat, "Temaşekerdişê binpaykerdişê heqê merdiman hemparîya sucî ya. Eke yeno waştiş ke problemê Tirkîya bêrê çareserkerdiş, ganî tecrîd bêro wedaritiş.”

 

Necdetî tecrîd sey îşkenceyî pênase kerd û vat, "Ganî no bêro peynîkerdiş. Seba aştî Tirkîya de serwer bibo. Seba cuyêka azad û têduşt ganî prosesê dayîşûgirewtişî bêro destpêkerdiş. Tewr peyîn serdayîşê CPTyî mîyanê komelî de bi cayê endîşeyan.  Ganî her kes vera nê bêedaletî wurzo. Bêvengî hemparîya sucî ya. Ganî Wezaretê Edaletî lezabez cewab bido.”