MERKEZÊ XEBERAN - Nasnameyê 11 endamê HPGyî ke hêrişê çekanê kîmyewîyan de ameyî qetilkerdiş, ameyî eşkerakerdiş.

 

Hêrişê Tirkîyaye hemverê herêmê Zapî, Avaşîn û Metîna yê serê başûrê Kurdistanî de dewam keno. Merkezê Neqlkerdişî û Çapemenîye ya HPGyî neql kerd ke 11 endamê HPGyî 5ê teşrîna peyêne de hêrişê çekanê kîmyewîyan de ameyî qetilkerdiş. Goreyê xebera ajansa ANFyî, dewa Sacayî serê herêma Zapî de bi hawayêke zêde çekê kîmyewî ameyê şuxulnayîş.

 

Eşkerayîye de ame neqlkerdiş ke netîceyê caardişê çekanê kîmyewîyan û qedexekerde de “Tunelê şerî yê Şehîd Xursî” 5ê teşrîna peyêne de 11 endamê HPGyî û YJA-Starî ameyî qetilkerdiş. Eşkerayîye de ame dîyarkerdiş ke dîmenê şuxulnayîşê çekanê kîmyewîyan nê wareyî de ameyî belgekerdiş. Eşkerayîye de wina ame vatiş: “Ma nê game raşt nêvînenê ke nê dîmenan bi rayaumûmî reyde pare bikerê. Ma eşkenê bidê sazgehê berpirsîyar yê babeta cigêrayîş bikerê û sûcê şerî yê dewleta tirke ptesdîq kerd. Cayê ke nê hemrayê ma la şehîd bîyê nêzdîyê dewa Saca ya nehiya Şêladizê ya qezaya Amedî ya başûrê Kurdistanî ya û ma neql kerdî ke yê biwazê eşkenê bêrê, yê wazenê cigêrayîş bikerê zî ma eşkenê goreyê îmkanê hetkarî bidê.”

 

Nasnameyê kesê ke hêrişê çekanê kîmyewîyan de ameyê qetilkerdiş wina yê: "Mesut Eren (Ferman Kerîm), Xemgîn Şahînoglû (Sabrî Cîlo), Eylem Akgun (Jînda Serhed), Bawan Mihemed (Helmet Viyan), Ebid Ebdilah (Dilşêr Reqa), Canda Îsmaîl (Adar Çiya), Yunus Alkan (Harûn Firat), Pervîn Muhammed (Arvîn Tolhildan), Îsmaîl Çelîk (Azad Pirsûs), Silvana Mihemed (Hêvî Welat) û Îsa Kurtay (Sefkan Adar)"

 

Merkezê Neqlkerdiş û Çapemenîye ya HPGyî 18ê teşrîna verêne de zî eşkerayîyêke dabî û nasnameyê 17 endamê xo ke hêrişê çekanê kîmyewîyan ê aşma tebax, êlul û teşrîna verêne de pê ameyo, dinyaya xo bedelnayî eşkera kerdibi. Sewbîna HPGyî de eynî eşkerayîye de vatibi ke 27 endamê înan zî tarîxê cîya de bi eynî hêrişê çekanê kîmyewîyan de dinyaya xo bedelnayê.