Sema Çaglak

 

ŞIRNEX - Dayîka tepişteyo bi nameyê Kerem Ayasî, Leyla Ayase dîyar kerd ke tepişteyê Zîndanê Gîresunî de hemverê binpaykerdişê heqan û zilmî de grevê vêşanîye de yê û vat: “Xeylê tepişteyî zîndan de dinyaya xo bedelnayî. Kesê wayîrê wijdan vejîyenê raşteyan û benê vengê tepişteyan.”

 

Tecrîd, zext û binpaykerdişê heqan her ke şino zêde beno. Vera nê caardişan de tepişteyî dest bi greve vêşanîye kenê. Nê zîndananê ke grevê vêşanîye tede dîyayo dest pêkerdiş ra yew zî Zîndanê Gîresunî yo. Dayîka Kerem Ayaso ke 7 serrî yo tepişte yo û nika Zîndanê Gîresunî de yeno tepiştiş Leyla Ayase seba tepişteyan vengê hîsgerîye kerd.

 

‘Tepişte wazenê vengê înan bêro eşnawitiş’

 

Leylaye dîyar kerd ke heme heqanê xo ra bêpar ameyî verdayîş û vat: “Tepişteyî zîndanan de zilmî mîyan de yê û tedaya serê înan her ke şina zêde bena. Teda û zilmo ke bi înan yeno kerdiş vera tepişteyî kewtî greve vêşanîye û wazenê ke vengê înan bêro eşnawitiş. Tepişteyî wazenê ke zilmo ke bi înan yeno kerdiş peynî bibo. Gama ke nêweş kewenê nêbenê nêweşxane û wexto ke benê zî bi kelemçekerde benê û îşkence bi înan yeno kerdiş. Kelepulê înan yê sey televîzyon, radyo û kitabî yenê girewtiş û dest ronîyenê înan ser. Xeylê tepişteyê nêweşî estê û înan nêbenê nêweşxane. Xeylê reyan destur nêdanê ke tepişteyî keyeyê xo reyde bikewê têkilî. Heqê înan yê pêvînayîşê telefonî yeno astengkerdiş. Tepişteyî zî vera nê caardişan de kewtê çalakîya grevê vêşanîye. Lajê mi vano ‘heta ke waştişê ma nêrê caardiş ma do fek çalakîya xo ra vera nêdê’.”

 

‘Lazimî bi paştîdayîşî esta’

 

Leylaye dewamê qiseykerdişê xo de da zanayîş ke tepişteyî binê tecrîdêk giran de xover danê û vat: “Tutê ma seba mi û seba xo têkoşîn nêdanê. Zilmî reyde rî bi rî manenê. Keyeyê tepişteyan seba înan têkoşîn danê. La tena keye nê ganî herkes wirzo payan ser, vejîyo raşteyan û bibê vengê tepişteyan. Ganî kesêk xo na rewşe ra kerr û lal nêkero û çimanê xo nêgêro. Lazimî bi paştîdayîşî esta. Zîndanan ra cenezayê tepişteyan vejîyenê. Kesê wayîrê wijdan senî eşkeno qebul bikero. Ma nêwazenê êdî zîndanan ra cenaze bêrê vetiş. Seba tepişteyê ke zîndanan de şertanê xiraban vera dinyaya xo bedelnenê rê hukmat vano tepişte xo kişenê. Ma bawer nêkenê ke tepişte xo bikişê. Kesê ke seba dewaya xo têkoşîn danî xo nêkişenê. Çimkî wayîrê îrade û bawerî yê.”

 

‘Ganî têkoşînêk topyekun bibo’

 

Leylaye tewr peynî înan vat: “Keyeyê tepişteyan zilmî û tedaya zîndanan qebul nêkenê. Ne heq, huqûq, ne zî merdimîye mendo. Hemverê tepişteyan de muameleye xirabî yenê kerdiş û bi no hawa hem bi tepişteyan û hem zî bi keyeyê tepişteyan zilm yeno kerdiş û yenê tecrîdkerdiş. Tepişte hemverê zilmê zîndanan xover danê û keyeyê înan zî teber de xover danê. Eke ma bi têkoşînêk topyekun wurzê payan ser ma do bibê vengê tepişteyan û vengê înan do teber de bêro eşnawitiş.”