WAN - Seba Emîne Karaye (Evîn Goyî) ya Têgêrayîşê Kulturî yê Mîr Perwerî (Mehmet Şîrîn Aydinî) û Abdullah Kizilî ke qetlîyamê Parisî yê Fransa de ameye qetilkerdiş Ewropa û xeylê bajaranê bînan de protesto dewam kenê. Cinîyê Wanî zî dîyar kerdî wext wextê bêvengîye nîyo, wext wextê berzkerdişê vengî yo.

 

Roja îne hemverê Merkezê Kulturê Kurd yê Ahmet Kayayî yê Parisî de hêrişê çekdarin pê ame. Netîceyê hêrişî de Emine Karaye (Evîn Goyî), têgêrayîşê kulturî ra Mîr Perwer (Mehmet Şîrîn) û Abdurrahman Kizilî ameyî qetilkerdiş. Badê qetlîyamî Kurd û dostê kurdan herikîyayî raşteyan û vatî ke kiştoxê qetlîyamê hirê sîyasetmedarê Kurdî ke Paris de 9ê çeleyê 2013î de ameyî qetilkerdiş nêvejîyayî raşte û coka ra qetlîyamê newe pê ameyî.

 

Ewropa û xeylê bajaran de protestokerdiş dewam keno û cinîyê Wanî zî dîyar kerdî ke wext wextê bêvengîye nîyo wext wextê berzkerdişê qîrayîşî yo.

 

Wext wextê bêvengîye nîyo

 

Kaybaza Tîyatroyî Berîvan Budakbeyoglu da zanayîş ke no qetlîyamê Parisî şermizar kena û vat ke her roje bi hêrişanê neweyan wirzena û vat do hemverê hêrişan bêveng nêmana. Berîvane wina vat: "Heta cayêk bêvengîye ganî qêrayîş bibê. Ewro Parîs de hêriş pê ame û do berê her kesî bidê. Seba no zî ganî kesêk bêveng nêmano. Wexto ke babete bena kultur û ziwanê Kurdî çi heyfo ke qedexe  ya zî qetlîyam pê yenê. La ma do fek rayîrê xo ra vera nêdê."

 

'Hêriş hemverê têgêrayîşê Kurdî de yo'

 

Hemsereka GOÇ-DERî Gulşen Kurte dîyar kerde ke qetlîyamê Parisî hêrişêk hemverê têgêrayîşê Kurdî yo û wina vat: "Hêriş û qetlîyamî Ewropa de zî vejîyayî. Qetlîyamê 9ê çeleyê 2013î de Sakîne Cansiz, Fîdan Dogan û Leyla Şaylemeze ameyî qetilkerdiş. No hêriş zî hemverê têgêrayîşê cinîya Kurde de bî. Hêrişo ewro zî hem hemverê têgêrayîşê azadîye yê cinîya Kurde hem zî şarê Kurdî de pê ame."

 

'Polîtîkayê dewlete cesaret danê'

 

Gulşene wina dewam kerde: "Amacê hêrişan no yo; têgêrayîşê Kurde ra tersenê. Bi hawayêk sîstematîk hemverê şarê Kurdî de qetlîyam pê anê. Ganî bi lez peynîya qetlîyamanê Parisî bêro. Ganî kerdoxî bêrî cezakerdiş. Eke nêrê cezakerdiş do qetlîyamî dewam bikerê. Ma Kurdî nê çîyan qebul nêkenê. Hêrişê hemverê Merkezê Kulturê Kurd yê Ahmet Kayayî hemverê nasname, kultur û ziwanê Kurdî de yo. Nê hêrişan û qetlîyaman tecrîdî vera kenê. La wa bizanê ke ma nê polîkayan qebul nêkenê. Ma qetlîyamî şermizar kenê.

 

'Şarê Kurd hedef de yo'

 

Hemsereka HDPyî ya Rayîrê Armuşî ya Wanî Canan Uzunaye zî da zanayîş ke qetlîyamê Parisî de şarê Kurd ame hedefgirewtiş û 2013î de zî qetlîyamêk Paris de pê ame û hirê kesî ameyî qetilkerdiş û nê çîya ard ziwan ser: "Dima ra vizêr qetlîyam pê ame û hîrê kesî ameyî qetilkerdiş. Qirkerdişî girêdayeyê yewbîyaye yê. Ma baş zanê ke hêrişî hetê kamî ra ameyê meydan. Amancê înan oyo ke têkoşîn ra peyser game bêro eştiş. La wa her kes bizano ke têkoşîn do her ke şêro dewam bikero.”

 

‘Nê hêrişî peymanê mabêne dewletan de yê’

 

Canane dîyar kerd ke nê hêrişê peymanê mabêne dewletan de yê û wina qedêna: “Nê hêrişî bi peymanê mabêne dewletan de pê yenê. Na komploya mabêne dewletan a. Nê girêdayeyê yewbînan ê. Çi destê înan ra ame şarê Kurdî rê kerdî. La ma vejîyayî mîlyonan. Şarê Kurdî her çî zano. Şarê kurdî aya bi. tîya ra tepîya çi destê ma ra bêro ma do bikerê. Ez wazena venga pêro şarê Kurdî bikerî.”

 

‘Ma şikdaran baş nas kenê’

 

Ressema Aryen Huner, Zozan Bor zî hêriş şermezar kerd û vat, qirkerdişê dewamîya serê Sakîne Cansize yo û ercnayîş kerd: “Ma şikdarî baş nas kenê. Yê bêveng zî şikdar ê. Wa şikdarî baş bizanê ke do nêeşkê erc û kulturê şarê Kurdî çin bikerê. Ma xebatê Emîne Kara, Mîr Perwer û Abdullah Kizil yê ameyî qetilkerdiş dewam bikerê. Do bi nê qirkerdişan nêeşkê şarê Kurdîî çin bikerê.”