ANQARA - Hemsereka KON MEDî Zubeyde Zumrut hêrişê çekdarî yê hemverê Merkezê Kulturî yê Ahmet Kaya yê Parîsî ercna û vat, hêriş plankerde yo û dewamê hêrişê hemverê hîrê sîyasetmedarê Kurdî yê 9ê Çeleyî 2013ine de ameye qetilkerdişî yo. Zubeyde vat, ganî qirkerdişê Fransayî bêro roşnkerdiş.

 

Roja îne hemverê Merkezê Kurdî yê Ahmet Kaya yê Parîsî hêrişê çekdarî pê ame. Hêriş de Emîne Kara (Evîn Goyî), tevgerê kulturî Mîr Perwer (Mehmet Şîrîn Aydin) û Abdurrahman Kizil ameyî qetilkerdiş. Derheqê hêrişî de kesêk ame tepiştiş. Dimayê nê qirkerdişî Kurdî û dostê Kurdan vejîyayî raşteyan û vatî, seba kiştoxê qirkerdişê hîrê sîyasetmedarê Kurdî yê Parîsî 9ê Çeleyî yê 2013ine de nêvejîyayo werte qirkerdişê neweyî pê ameyî.

 

Sara, Rojbîn, Ronahî…

 

9ê Çeleyî yê 2013ine de qirkerdişê Buroyê Enformasyonê Kurdistanî yê Parîsî yê Fransayî de pê ame, yew awankerdoxa PKKyî Sakîne Cansiz, temsîlkara KNKyî ya Parîsî Fîdan Dogan û endama Tevgerê Ciwananê Kurdan Leyla Şaylemez ameyî qetilkerdiş û serê serebûtî ra 10 serrî derbaz bi. La cipersayîşê ame destpêkerdiş de tu averşîyayîş nêvirazîya. Kiştox Omer Guney 8 rojî dimayê serebûtî ame tepiştiş, vejîya werte ke têkiliyê ey bi MÎTî reyde esto. Tirkîya heme îdian înkar kerd û serdayîşê derheqê têkiliyê Omer Guneyî de zî red kerd. Dimayê mergê biguman ê kiştox Omer Guneyî, dewa zî kewt.

 

Îtîrafê elemanê MÎTî

 

4ê Tebaxa 2017ine de Başûrê Kurdistanî de PKKyî operasyonêk kerd û berpirsê MÎTî Erhan Pekçetîn û Aydin Guney ameyî tepiştiş û Ajansê Xeberan ê Firatî (ANF) ca dayî îtîrafê înan. Serê îtîrafê endamê MÎTî û vejîyayîşê xeberanê newe ra cipersayîş ame destpêkerdiş. La Fransayî qerarê nimitişê derheqê cipersayîşî de, da.

 

Hemsereka Konfederasyonê Komeleyê Kurdistanî (KON MED) Zubeyde Zumrut derheqê qirkerdişê diyîn ê Parîsî de ercnayîş kerd.

 

‘Berpirsîyar Tirkîya ya’

 

Zubeyde da zanayîş ke hêrîşê hemverê Merkezê Kulturê Kurdî yê Ahmet Kaya tesaduf nîyo û vat, seba şikdarê hîrê siyasetmedarê Kurdî nêameyî vînayîş û dosya bi lez û bez ameye padayîş no qirkerdiş pê ameyo û no dewamê ci yo. Zubeydeye nê çî vat:  “10ine serrgêra qirkerdişî 9ê Çeleyî nêzdî beno. Kurdistan û Ewropa de amadekarîyê cidî yê vîrardişî estê. La qirkerdişêk wina pê ame û no tesaduf nîyo. Eke o qirkerdiş biameyîne roşnkerdiş ma do ewro hîrê embazanê xo vînî nêkerdêne. Berpirsîyarê nê  Tirkîya û Fransa yo.”

 

‘Ma bêvengîya hukmatê Fransa qebûl nêkenê’

 

Zubeyde dîyar kerd ke sebebê nêroşnkerdişê 9ê Çeleyî, bi sebebê qirkerdişî bînan û vat: “Kurdê Ewropayî reaksîyonê cidî nîşan danê. Hêrsê înan xeylêk pîl o. Eke hukmatê Fransayî nêwazeno bibo hemkarî nê qirkerdişî û qirkerdişê 9ê Çeleyî yê 2013ine ganî kiştoxanê qirkerdişî vejo werte. Derheqê dosyaya Sakîneye de bi desan rey muracatî ameyî kerdiş û tu cewabêke nêame dayîş. Yew gamêke nêameye eştiş. Goreyê ma kiştox Omer Guney zîndan de nêmerdo. Yan înan bixo kişt yan zî hema pawenê. Ma nê hemkarîya înan qebûl nêkenê. No qirkerdiş zî qirkerdişêk plankerde û bi zanebîyayîş ameyo kerdiş o. Berpirsîyarê ci dewleta tirk a. No palenêk newe nîyo. No dewamê qirkerdişê 9ê Çeleyî yo.”