Zelal Tunç

 

WAN - Reaksîyonê hemverê destbendkerdiş û tedayan ke xeylê bajaran de hemverê DBPyî de pê ame dewam kenê. Wan de cinîyan dîyar kerd ke amacê operasyonan no yo ke tecrîdê serê Rayberê PKKyî Abdullah Ocalanî nêkewo rojev û vatî ke her raşteyî de têkoşîn bikerê. 

 

Bi talîmatê Serdozgerîya Komarî ya Amedî vizêr keyeyê Hemserekê Pêroyî yê Partîya Herêmanê Demokratîke (DBP) Keskîn Bayindirî zî tede xeylê bajaran de bi hawayêk hemwext polîsan eşt keye û awanîyê DBPyî ser de û bi desan kesan destbend kerdî. Amed, Wan, Agirî, Muş, Êlih, Şirnex, Dîlokî de hemserek û îdarekarê DBPyî ameyî destbendkerdiş. Polîsî wextê cigêrayîşî de malumat nêda avûkatan û cigêrayîş kerd. Cigêrayîş de kitab, lîsteya endaman, belge û flamayê partîye ameyî vilakerdiş. Dima ra îdarekar û endamê partîye reaksîyon mojnayî polîsan. Sewbîna xeylê bajaran de bi tewrbîyayîşê xeylê kesan rayîr ra şîyayîş û eşkerayî pê ameyî û destbendkerdişî ameyî protestokerdiş.

 

‘Hemverê polîtîkaya tecrîdî de do têkoşînê ma dewam bikero’

 

Wan de cinîyan reaksîyon mojna zext û destbendkerdişanê hemverê DBPyî û dîyar kerdî ke teda do bi înan gamêk tepîya nêda eştiş. Endama Heyetê Îdarekarîya Merkezî (MYK) ya DBPyî Aynur Saricaye dîyar kerde ke sereştişî tebere huqûqî yê û amacê operasyonan no yo ke tecrîdê serê Rayberê PKKyî Abdullah Ocalanî nêkewo rojeve. Aynure wina vat: “Ma vanê ke nê hêrişî sere bi ma nêdanî ronayîş. Amacê operasyonan dîyar o. La hemverê nê operasonan de do her raşteyî de xebatê ma dewam bikerê. Seba polîtîkayê tecrîdî yê serê Birêz Abdullah Ocalanî bêrê şikitiş do têkoşînê ma dewam bikero.” 

 

‘Cinî û ciwan do sere nêronê’

 

Endama Meclîsê Partîye (PM) ya HDPyî Sarya Bîlîcîye zî hêrişê polîsan yê hemverê merdimanê tepişteyan yê Nobet Edaletî yê Stenbolî û fînayîşê perlementerîya parlementera HDPyî ya Amedî Semra Guzele ard vîr û wina vat: “Se kenê wa bikerê, nê teda û hêrişî nêeşkenê têkoşînê ma bidê vindarnayîş. Ma do wayîrê heqanê xo bivejîyê. Ma do tu raşteyêk veng nêverdê. Îqtîdar demanê xo yê peyênan cuyeno. Bi serran texa bi partîya ma kenê. Vera nê hêrişan têkoşînê ma roj bi roje gird bî. Ma kurdî do wayîrê îradeyê xo bivejîyê. Ma cinî û ciwanî do her raşteyî de têkoşîn bikerê.”

 

'Do her ca de xebatê ma dewam bikerê’

 

Îdarekara HDPyî ya Wanî Mukaddes Kara Koçe zî da zanayîş ke nê zextan qebul nêkenê û wina vat: "Hewl danê xebatê partîya ma îlegalîze bikerê. La ganî tu kes hemverê hêraşan de bêveng nêmano. Xebatê ma do her raşteyî de dewam bikerê."

 

'Semra parlementera şarî ya'

 

Hemsereka HDPyî ya Wanî Handan Karakoyune zî reaksîyon mojna operasyonê destbendkerdiş û hêrişan û wina ercnayîşanê xo kerd: "Ma ewro bi qirkerdişê sîyasî şîyar bîyî. Ma bi nê polîkayan zanê ke çi yeno hedefgirewtiş. Ma zanê ke têkoşînê ma çend muhîm o. Ma zanê ke bi nê polîkayan îqtîdar wazeno xo xelas bikero. Zîhnîyeto ke perlementerîya Semra Guzele fîna û zîhnîyeto ke ewro operasyonan keno eynî yo. La nê polîkayî do qet vernîya têkoşînê ma nêgîrê. Semra Guzele parlementera şarî ya. Rayanê şarî girewta. Hewldayîşê îqtîdarî do bibo peynîya ci."