Rojda Aydin

 

MÊRDÎN - Cinîyê Mêrdînijî, reaksîyon vera operasyonê ke hemverê DBPyî pê ame û vatî: "Kurdî do wayîrê partîya xo vejîyê. Bi nê hêrişan wazenê wareyê sîyasetî veng bikero. Nê operasyonî hemverê huqûq û edaletî yê.”

 

Çarçewaya cipersayîşê hetê serdozgerîya Komare ya Amedî ra dîya destpêkerdiş, xeylêk bajaran de eştî serê merkezê Partîya Herêmê Demokratîk (DBP) û xeylê kesî destbend kerdî û hemserekê înan zî ameyî destbendkerdiş. Xeylêk wareyan de hemverê nê operasyonan de reaksîyonî her ke şinê girs benê. Cinîyê Mêrdînîjî zî reaksîyon vera operasyonan dayî û vatî, ê do hemverê nê hêrişan de bêveng nêmanê.

 

‘Bi nê hêrişan wazenê wareyê sîyasetî veng bikerê’

 

Aktîvîsta Tevgerê Cinîyan ê Azadan (TJA) Ayşe Bozan, dîyar kerd ke hêrişî hemverê demokrasî, azadî û sîyasetê şarê Kurdî yo û wina vat: “No operasyon hemverê azadîwaştoxan o. No demêk derg o bi her hawayî serê sîyasetê kurdî û kesê ke azadî û demokrasî wazenê, hêrişêk bêsînor kenê. Bi qetilkerdiş, kiştiş, destbendkerdiş û tepiştişî hêriş kenê. Vizêr xeylêk bajaran de eştî serê bînayê DBPyî, hemserekê ma destbend bî. Ma nê hêriş û operasyonan şermezar kenê. Bi nê operasyonan nêzdîbîyayîşê hemverê şarê Kurdî û sîyasetê kurdî mojneno.  Ma bi îqtîdarêkê yew camêrdî reyde bi serran o rî bi rî mendî. Roja ke ameyo serê îqtîdarî bi hêrişê tewir bi tewir hêriş keno. Îqtîdarêkê wina yo ke xêrcê fikr, bawerî û îdeolojîyê xo, tu kesî qebûl nêkeno. Kesê ke hemverê nê de qisey bikerê, bifikrîyê û hemverê înan wurzê, bi her hawayî hêrişê înan kenê. Vernîya ma de prosesê weçînayîşî esto. Bi nê operasyonan wazenê wareyê sîyasetî veng bikerê. Wazenê goreyê xo weçînayîşêk bikerê.”

 

‘Ma do wayîrê partîya xo vejîyê’

 

Ayşe, dîyar kerd ke DBP partîyêke azadîwaştox, demokrat o û wazeno siyasetêko hempar awan bikero û wina vat: "DBP wazeno temsilîyet û bawerîya heme şaran bibo. DBP wazeno komelêk zana û bi perwerde awan bikero. La kesê ke hemverê nê fikr, ne bi her hawayî hêrişê DBPyî kenê. Hemverê nê  hêrişan ganî şarê ma xo bi rêxistin bikero û wayîrê sazgehê xo vejîyê. Şarê ma wa wayîrê partîya xo vejîyê. Bi her hawayî her ware de, her kuçe û her ca de bikerê cayê sîyasetî, xoverdayîşî. Ma do wayîrê partîya xo û bawerîya xo vejîyê.”

 

‘No bêhuqûqî û bêedaletî yo’

 

Îdarekara DBPyî ya Mêrdînî Adule Aksuye zî operasyonê hemverê partiye şermizar kerd û hêrişê ke ameyî kerdiş sey ‘No bêhuqûqî û bêedaletî’ bi name kerd. Aduleye wina dewam kerd: “Ma her rojê xo bi destbendkerdiş, tepiştiş û hêrişan vîyarnenê. Ma zî partîyê sîyasîyan ra yê û sey heme partîyanê bînan ma zî her ca de sîyasetê xo kenê. Ma çîyêko îllegal nêkenê. Ma nê caardişan qebul nêkenê. Qet hêrişê partîyanê bînan nêkenê. Partîya ma partîyêk demokratîk a û ma wazenê demokrasî heme raşteyan de awan biba. Coka ra zî hêrişê hemverê ma tu gamêk tepîya bi ma nêdanê eştiş û ma do tîya ra pê zî nêerzê. Wa heme şarê ma wayîrê partîya xo bivejîyo. Ma do hertim raşteyan de xebatan rayra berê. Bi serran o hêrişê ma kenê. La ma qet fek xebatanê xo ra vera nêda. Coka ra zî wa ewro heme şarê Kurd bêro û wayîrê partîya xo bivejîyo.”

 

‘Hemverê nê operasyonan de ma bêveng nêmanenê’

 

Endama Meclîsê Şaredarîya Artukluye ya HDPyî Medîne Aksoye zî da zanayîş ke îqtîdar hemverê partîyanê muxalîfan de hêriş dayo dest pêkerdiş û roj bir roje hêriş zêdîyenê û wina dewma kerd: “Coka ra zî ma nê hêrişan qet qebul nêkenê. Heqê heme partîyan esto ke raşteyan de xebatanê rêxistinkerdişî bikera. DBP zî heqê xo yê xebat û gureyî şuxulneno. No operasyon hemverê xebatanê partîya ma de ame kerdiş. Bi nê hêrişan wazenê vernîya nê xebatan bigîrê. Nika kar û xebatê DBPyî xo rêsitinkerdiş o. Her raşteyî de kar û xebatanê xo bi hawayêk aktîf rayra beno. Bi tepiştiş û destbendkerdişan wazenê vernîya nê çîyî bigêrê. La hemverê operasyonan de ma qet bêveng nêmanenê. Ma do her raşteyî de çalakîyanê xo dewam bikerê. Bi nê hêrişan wazenê vernîya sîyasetê demokratîke bigêrê. Sewbîna sey aşma çeleyî ke dewaya girewtişê HDPyî esta, ewro zî hêriş esto. sewbîna zanê ke vernîya ma de weçînayîş esto. seba ke vernîya parîta ma bigîrê nê operasyonan rayra benê. DBP wazeno mîyanê komelî de demokrasî awan bibo. Ganî şarê ma zî vejîyo raşteyan û nê hêrişan şermizar bikero. Ganî bi partîya xo reyde mîyanê paştîdayîşî de bê.”