ANQARA - Sîyasetmedarê cinî reaksîyon mojnayî zext û destbendkerdişê hemverê DBPyî û vatî: “Yê ke xover danê do ser bikewê. Yê zextan kenê zî do vînî bikerê. Têkoşînê ma do dewam bikero.”

 

Çarçeweya polîtîkayê şero taybet yê îqtîdarî ke hemverê kurdan de rayra beno deam keno. 22ê kanûne de parlementerîya Partîya Demokratîke ya Şaran (HDP) Semra Guzele bi rayanê AKP-MHPyî ame fînayîş û vizêr 9 bajaran de sereştişê buroyê Partîya Heremê Demokratîke (DBP) û xeylê keyeyan virazîya. Na çarçewa de tehqîqato ke Serdozgerîya Komarî ya Amedî rayra berdêne de 14 kesî ameyî destbendkerdiş.

 

Heto bîn de yewna hêriş zî vizêr paytextê Fransa Parîs de virazîya. Parîs de hemverê Merkezê Kulturê Kurdan yê Ahmet Kayayî de hêrişo çekdarin pê ame. Goreyê malumatê ke Ajansê Xeberan yê Firatî ra ameyî girewtiş taxa Denîs yê Straburg Saîntî de hemverê Merkezê Kulturê Kurdan yê Ahmet Kayayî de hêrişo çekdarin pê ame. Ame dîyarkerdiş ke dikanê aîdê kurdan yê dormeyê merkeze kulturî ser de zî gule ame rijnayîş û şahidê qewimîyayîşî dîyar kerdî ke keso ke wesayîtî ra vejîya hêrişê çekdarin pê ard.

 

Sewbîna zî ame zanayîş ke hêrişkar restorantê aîdê welatîjêk Kurd û salonê kuaforî yê aîdê Kurdan zî kerdo hedef û reşênayo nê dikanan ser. Hêriş de tewr tay 10 kesî birîndar bîyî û 3 kesî zî dinyaya xo bedelnayî.

 

Sîyasetmedarê HDP û DBPyî derheqê hêrişan de ercnayîş kerdî.

 

‘Fehm kerd ke do weçînayîş de vînî bikero’

 

Hemsereka HDPyî ya Anqara Pakîze Sînemîllogluye bale ante fînayîşê parlementerîya Semra Guzele ser û vat: “Ma do nê caardişan qebul nêkerê. No hêriş hemverê îradeyê şar û têkoşînê cinîyan de pê ameyo. Se kenî wa bikerê, Semra Guzele îradeyê ma ya, parlementera şarî ya. Bloke faşîst yê AKP-MHPyî fehm kerdî ke do weçînayîş de vînî bikerê. Hemverê partîya ma û rêxistina ma de her tewir hêriş pê yenê. La tu fêydeyê tersî çin o. Do yê ke xover danî ser bikewê, yê ke zext kenî zî do vînî bikerê. Ma şêrişê hemverê DBPyî şermizar kenê.”

 

‘Ganî şarê kurdî bêveng nêmano’

 

Endama Meclîsê DBPyî Kiymet Temel zî betalkerdişê parlamenterîya Semra Guzel şermezar kerd û vat, no darbeyêko hemverê îradeyê şarê Kurdî yo. Kiymete wina vat: “Sere de cinîyê Kurdî, ganî şar hemverê nê bêveng nêmano. Hewldayîşê îqtîdarê faşîstî AKP-MHPyî veng ê. Şarê ma do cewabo tewr baş weçînayîşan de bido blokê faşîstî. Nê tedayî nînê qebûlkerdiş.”

 

‘Ma sereyê xo nêtewênenê’

 

Endama DBP PMyî Ayfer Balikçi zî dîyar kerd ke ê hemverê tedayan sereyê xo nêtewênenê û wina vat:  “Erzîya merkezê ma yê pêroyî, buroyanê ma û xeylêk keyeyan. Hemsereko pêroyî Keskîn Bayindir û îdarekarê ma ameyî destbendkerdiş. La nê baş bizanê. Nê polîtîkayê tedayî do netîce nêdê. Zîhnîyeto ke parlamenteriya Semra Guzel fîna, ewro hemverê partîya ma de operasyonê qirkerdişê siyasî keno. Ma tu wext hemverê nê zîhniyetê darbekar sereyê xo nêda ro û ma do nêdê ro zî.”