WAN – Cinîyê Wanijî dîyar kerdî ke hemverê hêriş û polîtîkayê tecrîdî yê îqtîdarî de do qet fek têkoşînê xo ra vera nêdê û her tim raşteyan de bibê. Cinîyan ra Berfîn Kuşmane wina vat: “Beno ke çalakîyê nobete peynî bibê. La çalakîyê ma do raşteyan de dewam bikero. Nobeta Edaletî peynî nêbena eksê ci do dest pêbikera.”

 

18ê kanûne de Stenbol de Dayîkî seba Nobeta Edaleyî ya seba tepişteyanê nêweşan û tepişteyanê ke înfazê înan ameyî veşênayîş dabî dest pêkerdiş. Dayîkî seba peynîardişê nobete rayraşîyayîşêk pê ardbî û wextê rayraşîyayîşî de polîsî dayîkan erdî ra kaş kerdî û îşkence bi dayîkan kerdî. Sewbîna polîsan lapat bi Hemserekê HDPyî yê Stenbolî Ferhat Encuyî zî dabî.  Cinîyê wanijî reaksîyon mojnayî rewşe û dîyar kerdî ke do têkoşînê xo dewam bikerê. 

 

Hemsereka Partîya Demokratîke ya Şaran (HDP) ya Wanî Handan Karakoyune reaksîyon mojnaye hêrişê polîsan û wina vat: “Ma do hemverê hêrişan de heta peynî têkoşînê xo dewam bikerê. Bedel çi beno wa bibo ma do her tim raşteyan de bibê.”

 

 ‘Zîhnîyet eynî zîhnîyet o’

 

Handane dewamê qiseykerdişê xo de bale ant rayraşîyayîşo ke 12ê kanûne de Wan de hemverê tecrîdî de pê ameybî ser û wina vat: “Rayraşîyayîşê Wanî de zî nizdîbîyayîş eynî bî. Hêrişê çalakîya Stenbolî tesîrê xo Wanî ser de zî kerd. Yanî zîhnîyet eynî zîhnîyet bî. Wextê çalakîyê Amed, Îzmîr, Wan û Stenbolî de zî eynî polîtîkaya bêhuqûqî ame cuyayîş. Ma vera tecîrdê serê Birêz Ocalanî de raşteyan de bî. Hêzê asayîşî bi şîdet hêrişê ma kerdî. Eynî hawa vizêr Stenbol de zî hemverê dayîkan û Ferhat Encuyî de pê ame. Heme Tirkîya no şîdet û caardişan dî.”

 

‘Bedel çi beno wa bibo ma do raşteyan de bê’

 

Handane peynîya qiseykerdişê xo de nê çîyan ard ziwan ser: “Heta bêhuqûqî raşte ra nêwedarîyo ma do têkoşînê xo dewam bikerî. Bedel giran bibo zî ma do her ca de raşteyan de bî. Hewldayîşê ma no yo ke ma sîstemo ke îqtîdar wazeno awan bikero, ekse ci bikerî û ê nêresê hedefe xo. Dayîkî seba edalet seba domananê xo seba wedarnayîşê tecrîdê serê Birêz Ocalanî her roje raşteyan de bî. La hewl danî ke waştişê dayîkan nêro eşnawitiş. Ma do qet fek têkoşînê xo yê heqdarî ra vera nêdî. Bedel çi beno wa bibo ma do raşteyan de bî.”

 

Hemsereka HDPyî ya Qelqeliyî Sakîne Kutpinare zî bale ante şîdetê polîsan ke hemverê Ferhat Encuyî de pê ardî, ser û vat ke nê caardişî kul, kîn û nefretê hemverê Şarê Kurdî mojnenê û şîdetê polîsan wina şermizar kerd: “No kul bi aştî, demokrasî û asayîşê Tirkîya gina. Ganî şarê ma hemverê nê nizdîbîyayîşan de bêveng nêmano.”

 

‘Qanûn çinî bîyî’

 

Rayîrbera HDPyî ya Tuşbaye Sonul Işike zî derheqê şîdetê polîsan de nêercnayîşan kerde: “Vizêr çalakîya Stenbolî de ma reyna dî ke Tirkîya de huqûq çinî yo. Ma her roje şîdeto ke bi dayîkan yeno kerdiş vînenê la ma vizêr hîna zêde hîs kerd.  No mojneno ke îqtîdarê AKP-MHPyî  êdî qedîyayo. Heqê merdiman yê çalakîyan esto û heqê keye û avûkatan esto ke tepişteyan reyde pêvînayîş pê bîyarî. La Tirkîya de no qanûn bi temamî çinî bîyo.”

 

‘Bi şikitişê tecrîdî encax no bêhuqûqî peynî bibo’

 

Songule peynîya qiseykerdişê xo de vat: “Seba ke îqtîdar aştîye ra terseno, hem dayîk hem zî cinîyan ra terseno. Tena cinîyê kurd û Şarê Kurdî nê ganî heme kesê ke aştî pawenê, hemverê nê bêhuqûqî û tecrîdî de têkoşîn bikerî. Bi şikitişê tecrîdî encax no bêhuqûqî peynî bibo.”

 

‘Do çalakîyê ma dewam bikerê’

 

Hemsereka HDPyî ya Payîzavaye Berfîn Kuşmane zî da zanayîş ke nê hêrişî hemverê fînalê Nobeta Edaletî yî û wina reaksîyon mojnaye: “Dayîk ameyî derbkerdiş û erdî ra ameyî kaşkerdiş. No do qet nêro vîrîkerdiş. Serê dayîkan de zilmêk gird esto. No zilm zî yeno no mana ke dayîkan ra tersenê. Dayîkê ma xeylê xurt î. Ma do qet sere nêronî û do rayîrê xo ra şêrî. Beno ke ma final kerdo la ma do raşteyan de bî. No peynî nîyo, eksê ci dest pêkerdiş o.”