WAN - Cinîya bi nameyê Nezahat Gura ke Zozanê Feraşînî ra nebatanê cîyayan arê dana û dermankerdişî de şuxulnena dîyar kerd ke nebatî seba serd û xeylê nêweşîyan şîfa yo.

 

Bi ameyîşê zimistanî reyde sere de sergirewtiş û xeylê nêweşîyê bînî zêdîyayî. Bi zêdebîyayîşê nêweşîyan re hetêk welatî sere metodê dermankerdişê tibî da û heto bîn zî bi metodê xozayî derman beno. Nezahat Gura da zanayîş ke bi taybetî seba serdgirewtişî xeylê bi şîfa yê û nebatan Zozanê Feraşînî ra arê dana. Nezahate qala fêdeyê nebatan kerd.

 

Bi rayîrê xozayî seba problemanê weşîye çareserî

Nezahate dîyar kerd ke 1992î ra heta nika seba nêweşîyê şewb, serdgirewtiş û sewbîna xeylê nêweşîyanê bînan nizdîyê 200 tewir nebetan arê dana û seba problemanê weşîye bena çareserî. Nezahate ard ziwan ke dayîka aye, vistirê aye zî bi nebatan re eleqedar benê û hema emrê xo yê şenikîye de nebatan musaya û seba nêweşîyan şuxulnena.

 

‘Feraşînî ra nebatanê cîya cîyayan arê dana’

 

Nezahata ke aşmanê wisarî de şina Zozananê Feraşî û nebatan arê dana wina vat: “Wexto ke ez şona zozanan vilikanê renginan arê dana. Ez nê nebatan yew bi yew pakî kena û wuşk kena. Amedekerdişê înan demêk derg gêno. Eke waştişê mi çinîbîyayêne mi nêeşkayêne gureyêk wina bikera. Ganî seba her gureyî zî waştiş bibo. Nebat, xoza kêfweşî dane mi.”

 

‘Mi her roje nebatêk newe kifş kerd’

 

Nezahate ard ziwan ke aye îdareyê keyeyê xo bi rayîrê dermankerdişo ke pê nebatanê xozayî yeno kerdiş û wina dewam kerd: “Şertê cuye nika zêde zehmet ê. Ma derde îdareyê xo de yê. Vera hende zor û zehmetî ez reyna zî gureyê xo ra kêfweş a. Ez bi metodanê xozayî xeylê kesan derman kena. Ez bi nebatan nêweşîyan rê bena şîfa.” 

 

Nebatê bi şîfa

 

Nezahate sewbîna bale ant nêweşîyê ke aşmanê zimistanî de vejîyenê ser û domna: “Cinî, tutî ferq nêkeno. Ez seba nêweşê ke bi nêweşîya sey sergirewtişî kewtî; kewçikêk tarçin, kewçikêk îsot û yew zî zencefîl dana. Hingimîn ya zî dims kena mîyanê ci û roje de hirê rayan ganî bêro werdiş û seba kuxikî xeylê baş o. Sewbîna kokê şîlan, kokê meyanî zî seba serdgirewtişî xeylê baş ê. Nê zî kewenê mîyanê awe û 7 deqeyî mîyanê awe de yenê pewtiş û roje de hirê rayan ganî bêro şimitiş. No zî xeylê bi fêde yo. No seba nêweşîya serdgirewtişî baş o.”

 

‘Sîr û pîyaz antîbîyotîk ê’ 

 

Nezahate tewr peynî qala nebatê ke seba stres û sikintiyê baş î kerd û wina qiseykerdişê xo qedênaye: “Stres vera merdim bêzar beno. Nebatê kehkira seba problemanê stres û sikintiyî baş ê. Wexto ke bikerê mîyanê şit û bişimnî xeylê baş o. Na nebate merdiman rehet kena. Eynî wextî de sîr û piyaz zî bi taybet ganî aşmanê zimistanî de bêrî werdiş. Sîr û pîyar antîbîyotîkê xozayî yê.”