DÊRSIM - Gulîzar Halîsa ke şahida qirkerdişê Dêrsimî ya û demê qirkerdişî de yena surhunkerdiş, dinyaya xo bedelnaye. Gulîzare 6 serrîya xo de yena surgunkerdiş.

 

Gulîzar Halîs yew a kesan ra ya ke qirkerdişê Dêrsimê rê şahid bîya û hem zî o wext ameya sirgûnkerdiş, şî heqîya xo. Gulîzar Halîse sey  Gulîzara Hesen Axa yena şinasnayîş, dewa Pakîre ya serê qezaya Xozatê Dêrsimî ra ya û demêkê derg bi ke bi hetkarîya tutanê xo ameyîne tedawîkerdiş. Gulîzara Hesen Axa seba nêweşe bî, şî heqîya xo. Gulîzare dayîka parlamenterê Dêrsimî yê verê Şerafettîn Halîs û nuştox Ûmûr Hozatli ya. Do cenazeya Gulîzare dewa Pakîre de bêra definkerdiş.

 

Surgunê dewa maciran yena kerdiş

 

Gulîzara ke qirkerdiş ra xelas bena, hema 6 serrîya xo de bi keyeyê xo reyde sirgûnî dewa Maciran ke qezaya Sandikliya Afyonî de ya bena. 9 serrî uca de  sirgûn de manena û dima ra agêrena dewa xo. Êdî aye qet dewa xo ra nêvisena û cuya xo uca de dewam kena û 2 kêna û 6 lajan ana dinya.

 

Pî û kalik yenê kiştiş

 

Pîyê aye Hesenê Heyder Axa dewa Axwêran ke xo nimitibi hetê leşkeran ra yeno kiştiş. Kalikê aye Heyder Axa zî zîndanê Xozatî de danê verê guleyan û yeno kiştiş.