Rojda Aydin

 

AMED - Têkoşînê esnafê cinîyan ê Bazarê Semtî yê Cinîyan ê Jiyane dewam keno. Sereka Bazarê Jiyane Nûrdan Saltik, dîyar kerd ke bi seran o probleman ciwîyenê û vat: "Hewl danê ke ma bazar ra vejê û temamî bidê esnafê camêrdan. Labelê ma nê çî qebûl nêkenê, ma do heta peynî wayîrê keda xo vejîyê.”

 

Serra 2013ine de Rêzanê Amedî de Bazarê Semtî yê Cinîyan ê Jiyane ame akerdiş. 9 serrî yo esnafê cinîyî tîya de şuxulênê û debara xo pê kenê. Bi xususî seba cinîyê ke şîdet rê mexdûr bîyê û wazenê bi tena sereyê xo serê lingan de bimanê, tîya de şuxulênê. No bazar serê nê esasî de amebî awankerdiş. Sere ra ewilî heta ewro camêrdî zî wazenê ke tîya de xo rê tezgahêkê akerê. Labelê serra 2019ine de pêwa Partîya Demokratîke ya Şaran (HDP) Rêzanî serbikewt zî mazbata nêame dayîş û şaredarî kewte destê AKPyî. Dimayê ke şaredarî kewte destê AKPyî camêrdî bazar de ameyî bicakerdiş. Nika zî hewl danê ke cinîyan bazar ra vejê.

 

Sereka Bazara Semtî ya Cinîyan ê Jiyane Nûrdan Saltik, derheqê babete de qisey kerd.  

 

'10 serrî ra zêdeyêr bazarê ma esto’

 

Nûrdane, dîyar kerd ke 10 serran ra zêdeyêr o no bazarê cinîyan esto û roj bi roje hûmara cinîyan zêde bena û wina vat: “Ma destpêk de bazarê sabîtî de şuxulênê. Labelê dimayê serrêke ma vejîyayê teberê bazarî û bazaranê xo awan kerd. Hewte de ma di rey, yan zî hîrê rojan vejîyayîne bazarê taxe. Labelê ma nika 6 rojê hewteyî taxa semta Bagcilarî de bazarê xo awan kenê û şuxulênê. Ma sey cinîyê esnafî xizmet şarê xo yê taxan rê benê û debara xo kenê.”

 

'Bi serran o ma probleman ciwîyenê’

 

Nûrdane, dîyar kerd ke destpêkê awankerdişê bazarê cinîyan de problem ciwîyayê û wina vat: “Bi serran o ma probleman ciwîyenê. Nê problemê ma nêameyî çareserkerdiş. Binê nameyê ‘Bagcilar pîl bi, cinîyê esnafî qîm nêkenê’ de çim veradayê cayê ma. Şaredarî nika zî wazena esnafê camêrdan bîyara na herême de bi ca bikera. Ma hemverê nê de çalakî viraşt. Serekê şaredarî vat, vila bibê û soz da ke do camêrdan nêyarê bazar. La no nîno a mana ke do êdî awan nêkerê. Demê bêrê de beno ke ma eynî problemî reyde rî bi rî bibê.”

 

‘Ma cayê xo nêdanê camêrdan’

 

Nûrdane wina dewam kerd: “Xora şaredarî esnafê camêrdan cayê ma de bi ca kerd. La ma nêwazenê ke êdî esnafê camêrdî yê bînî zî bîyarê cayê ma. No çî nîno qebûlkerdiş. Seba ke tu kes nêwazeno verê bazarî de bazarêk bîn bêro awankerdiş. Fermî de no çî qedexe yo. Eke no bazar bêro awankerdiş do sîstemê ma zî xira bibo. Êdî ma nêeşkenê sey verê karê xo bikerê. Cinîyê ke tîya şuxulênê heta ewro têkoşînêkê pîlî da û do têkoşînê xo zî dewam bikerê. Ma sey cinîyê esnafî tena hizûr wazeno. Ma wazenê ke ku selahîyetdarî vengê ma bieşnawê. Êdî kardî resa este. Ma wayîrê heqî yê ke cayê xo nêdanê camêrdan. Ma çend cinî bimanê zî ma do wayîrê keda xo vejîyê. Ma wazenê camêrdan tewrê bazarê ma nêkerê.”

 

‘Ma îtîraz kerd’

 

Nûrdane, wina vat: “Komîsyonê şaredarî seba ke esnafê camêrdî bîyarê, seba ca bikerê kombîyayîş organîze kerdê û qerar girewtê. Labelê no qerar hîn meclîsî rê derbaz nêbîyo. Derheqê na babete de tu zabitnameyêkê komîsyonî nêresayo destê ma. Dima ra ma nê qerarê komîsyonî dî. Ma bi avûkatê komelîyî muracatê şaredarî kerd û îtîraz kerd. Ma înan ra vat, fermîyet de no çî çin o ke merdim bazar serê bazarî de awan bikero. Coka zî no qerar şaş o. La ma hema zî cewabêkê nêgirewto. Ma nika pawe yê.”

 

‘Ma heta peynîye wayîrê keda xo vejîyê’

 

Nûrdane, tewr peyîn wina vat: "O keso ke bi serekê şaredarî ma ra vatêne, ‘Ez wazena biba serekêk baş û keda cinîyan bipawa.’ Labelê demê peyîn de qerarê ke ameyî girewtiş tesîrêk pîlî serê ma cinîyan de kerd. Ma nika paweyê qerarê meclîsî yê. Ma nêwazenê keda cinîyan bêra çinkerdiş. Esnafê camêrdî hêrişî heqê ma cinîyan kenê. Tîya de çimveşanîyêk esto. Çi beno wa bibo, ma do heta peynî wayîrê keda xo vejîyê.”