MERKEZÊ XEBERAN - Endama Meclîsê PYDyî Zelal Cegere da zanayîş ke ti cîyayeyêk mabenê sîyasetê vêşankerdişî yê hukmatê Şamî û sîyasetê îşxalkerdişî yê herra Sûrîye yê dewleta tirke yewbînan ra çin o.

 

Tebaxa verêne de hukmatê Şamî hemverê Kantonê Şehbaye de abluqa ferz kerdbî ke no 2018î ra nata yê tewr giran o. Bi rayîrê nuqtayê kontrolî yê rayîrê Heleb-Şehba ra derbazbîyayîşê derman, ardu û werdî bi temamî yeno astengkerdiş.

 

Derheqê abluqayî de endama Meclîsê Partîya Yewîya Demokratîke (PYD) Zelal Cegere ajansê ANHAyî rê qisey kerd û abluqaya hukmatê Şamî ke hemwextî hêrişê dewleta tirke ya îşxalkerde de pê anê, ercnaye.

 

Zelale dîyar kerd ke vera ke dewleta tirke xeylê cayanê vakurê Sûrîye sey Idlib, Efrîn, Cerablus, Bab, Serêkanîyê û Girê Spî îşxal kerda hema vaje çaryewê Sûrîye yo, la hukmatê Şamî paştîya sîyasetê dewleta tirke yê hemverê şarê herême keno û wina dewam kerd: “Ti cîyayeyêk mabenê sîyasetê vêşankerdişî yê hukmatê Şamî û sîyasetê dagirkerî yê herra Sûrîye yê dewleta tirke yewbînan ra çin o. No goreyê menfîetê wirdînan o û hemverê Sûrîye yo. Kombîyayîşê Tehran û Soçîyî de dewleta tirke rê rayîr ame akerdiş ke pê teyareyan hêrişê herêma Vakur û Rojhelatê Sûrîye bikera.

 

Rûsya hewl dana ke wirdî hukmatê Sûriyê û Tirkîya yewbînan ra nizdî bikera. La na nizdîbîyayîş serê hesabê şarê Sûrîye yo ke heta nika sîyasetê hukmatê Şamî û dewleta tirke ya îşxalkerde vera zehmetîyan ancenê.

 

Dewleta tirke ya îşxalkerde hêrişan de wazena ke xo sey dewletêk bi hêz û wayîrê îmkananê başan bimojna û bi no hawa tirkê nijadperestî bianca hetê xo.

 

Hukmatê Erdoganî heme kaxizanê xo şuxulneno ke weçînayîş de ser bikewo. La ma serra 2023î de yê û 100 serrîya pêkerdişê Lozanî temam beno ke netîce de dewleta tirke ya îşxalkerde do bacan bida Bosfor û Derdenîlî û ekonomîya xo xurt bikera. Coka ra Erdogan hewl dano serra newe ra ver hukmatê xo biweçîno ke goreyê ankêtan paştîdayîşê şarî ci rê se ra 30 kêmî bîya.