STENBOL - Kadîr Îsteklîyo ke 6 serrîya aye de tecawuzo sistematik bi H.K.G.ye kerd Pendîk de ame destbendkerdiş. Sewbîna pîyê H.K.G.ye Yusuf Zîya Gumuşelo ke paştî da nê çîyî zî ame destbendkerdiş.

 

Ronayoxê Weqfê Hîranurî yo ke pabeseyê Cemaatê Îsmaîlogluyî yo, Yusuf Zîya Gumuşluyî kênaya xo H.K.G.ye ya 6 serrî binê nameyê ‘zewajî’ de da murîdê xo Kadîr Îsteklîyî û H.K.G.ye bi serran raştê tecawuz û îstîsmarî yê sîstematîk ameye. Bado ke rewşe vejîya raşte derheqê Yusuf Zîya Gumuşlu û Kadîr Îsteklîyî de îdîaname ame hadrekerdiş.

 

Ameyî tepiştiş

 

Îdîaname 9ê kanûne de hetê mehkemaye ra ame qebulkerdiş. Dima ra derheqê Yusuf Zîya Gumuşlu û dayîka H.K.G.ye Fatma Gumuşluye de sucê ‘bi hawayêk sîstematîk îstîsmarê cînsî yê vera domanî’ ra heta 22 serr û 6 aşmî û derheqê Kadîr Îsteklîyî de zî sucê ‘bi hawayêk sîstematîk îstîsmarê cînsî yê vera domanî’ û ‘hêrişê cînsî’ ra heta 67 serr, 10 aşme û 15 rojî cezaya zîndanî dewa ame akerdiş. Faîlî dima ra bi qerarê dadgehe ameyî tepiştiş.

 

Mehkemaya Cezaya Girana ya 2. ya Anadolu ke îdîaname qebul kerd seba roniştişê dewaye 22ê gulana 2023î roj dabî. La reaksîyonê rayaumûmî ra dima mehkema qerar da ke roniştişê dewaye 30ê çeleyê 2023î bêro dîyîş.