MERKEZÊ XEBERAN - Berê Brandenburg yê Berlînî ke bi sloganê 'Jin jiyan azadî' ame roşnkerdene raştê eleqeyêk gird ame.

 

Dima ke cinîya kurde Jîna Emînî 16ê êlule de Tehran de hetê 'polîsanê exlaqî' yê Îranî ra amebî qetilkerdene serewedaritişê Rojhelatê Kurdîstanî û Îranî dest pêkerdbi. Çalakîyanê Rojhelatê Kurdistanî û Îranî ke felsefeya 'jin, jiyan, azadî' dewam kenî 3 aşman xo pey de verdayî. 

 

Serewedarnayîşê cinîyan rê yewna paştîdayîş Almanya ra ame. Vizêr bi hezar kesî paytextê Almanya Berlînî de Berê Brandenburgî ke sey sembol yeno zanayîş ra fotografan pare kerdî. Berê Brandenburgî yê Berlînî ke bi sloganê 'Jin jiyan azadî' ame roşnkerdene raştê eleqeyêk gird ame û şar nê dîmenan serê hesabanê xo yê medyaya komelkî de pare kerd.