MERKEZÊ XEBERAN - CPJyî derheqê binpaykerdişê heqan ê rojnamgeran de raporêkê weşêna û rapor de Tirkîya mîyanê 5 welatê ke tewr zêde rojnamegerî zîndan de yê mojna.

 

Komîteyê Pawitişê Rojnamegeran (The Committee to Protect Journalists-CPJ) derheqê rewşa rojnamegeran de raporêkê weşêna. CPJyî raporê xo yê weşna kerd ke wina vat: “Temamê dinya de serra 2022ine de xeylêk rojnamegerî ameyî tepiştiş. Na serre de xeylêk şer û teda virazyayî. Serekê otorîterî seba vengê mûxalifan bibirnê û azadiya çapemenîe bidê vindarnayîş, muxabîrîya xoserî sey suc vînenê. Serra 2022ine de 363 muxabîrî azadîya xo ra bêpar ameyê verdayîş. Goreyê parî nê dayeyî sera 20 zêde byê û rewşêka tehluke ya.”

 

Sewbîna rapor de ame dîyarkerdiş ke emsar tewr zêde Îran, Çîn, Myanmar, Tirkiye û Belarûsî de rojnamegerî ameyê tepiştiş.

 

Dewamê raporî de ame dîyarkerdiş ke Tirkîya û Îran de bi xususî serê rojnamegeranê Kurdî de tedayî xeylêk zêde bîyê û wina ame vatiş: “Îran de Kurdan berdêlê protestokerdişê hukmetî dayî û tewr tay 9 rojnamegerê Kurdî nika tepişte yê. Tirkîya de zî muxabîranê JINNEWSî, Ajansê Mezopotamyayî û xebatkarê şîrketê produksîyonî bi pêroyî 25 rojnamegerê Kurdî ameyê tepiştiş. Iraq de zî emsar qasê ke ame tespîtkerdiş hîrê rojnamegerî ameyî tepiştiş.”

 

CPJyî dîyar kerd ke Tirkîya de hûmara rojnamegeranê tepişteyan bîya 40 û bale antî serê nê çî ke qanûnê sansurî do açaryo hêrişê serê azadîya çapemenîye.