STENBOL - Nobeta Edaletî ke seba veradayîşê tepişteyanê nêweşan û tepişteyê ke cezaya înan qedîya ya la nînê veradayîş ameye destpêkerdiş, do 18ê Kanûne de bi rayraşîyayîşêkê girseyî peynî bibo. Merdimê tepişteyan seba rayîr ra şîyayîşî venga tewrbîyayîşî kerdî.

 

Merdimê tepişteyanê nêweşan û tepişteyê ke bi kêfî nînê veradayîş, seba rayîr ra şîyayîşê girseyî yê 18ê Kanûne venga tewrbîyayîşî kerdî û vatî, "Heta ke tecrîdê Îmraliyî peynî nêbo, tecrîdê zîndanan peynî nêbeno.”

 

Rayîrşîyayîş do saete 15:00 de Kadikoy de destpê bikero. Derheqê rayîr ra şîyayîşî de çalakîya Nobeta Edaletî eşkerayîye ameye dayîş.

 

Demê eşkerayîye de pankartê bi nuşteyê "Tecrîd sûcê hemverê merdimayî ye” ame akerdiş û sloganê, "Biciwîyo xoverdayîşê zindanan" û "Jin, Jiyan, Azadî" ameyî qîrînayîş.

 

Merdimê tepişteyan ra Kûmrî Akgul eşkerayîye da û ard vîr ke çalakîya înan a Nobeta Edaletî 2ê Sibate de bi destpêkerdişê merdişê tepişteyan, dest pêkerd.

 

Kûmrîye bale ant serê tecrîdê giran ê serê Rayberê Şarê Kurdî Abdullah Ocalanî û vat, "Heta ke tecrîdê serê Abdullah Ocalanî bêro wedaritiş, ma pêro tecrîdkerde yê.” Kûmrîye ard vîr ke bi aşman o agahî Abdullah Ocalanî ra nîno girewtiş û venga Komîteyê Vernîgirewtişê Îşkenceyî yê Konseyê Ewropayî (CPT) kerd: "Îmraliyî de çira pêvînayîş bi Ocalanî reyde nêkerd? Heta ke agahî Îmraliyî bêra girewtiş, ma do serê lingan de bê. Veradayîşê tepişteyanê nêweşan yeno betalkerdiş. Sebebê nê zî tecrîdê Îmraliyî yo. Heta ke tecrîdê Îmraliyî peynî nêbo, zîndanan de peynî nêbeno.”

 

Kûmrîye seba rayîr ra şîyayîşê 18ê Kanûne de venga tewrbîyayîşî kerd û vat: “Beno ke ma Nobeta Edaletî peynî bikerê, labelê heta ke edalet bêro ma do têkoşînê xo dewam bikerê. Senîn beno wa bibo, ça beno wa bibo dayîkî do serê lingan de bê.”