ANQARA - Hemsereka Yewîya Huqûqnasê Ewropa Barbara Spînellî da zanayîş ke tecrîdê serê Rayberê PKKyî Abdullah Ocalan binpaykerdişê heqan ê tewr pîl seserra peyîn o û vat do tarîx binuso. Barbaraye dîyar kerd ke CTP derheqê serdayîşê xo de eşkerayîye nêdayo, ganî no bivuryo û dayeyê bidestkerdişî pare bikero.

 

Seba tecrîdê giran yê Îmraliyî û sewbîna cezaya dîsîplînî Rayberê PKKyî Abdullah Ocalan û tepişteyê bînî agahî nîna girewtiş, avûkat û keyeyî nêeşkenê pêvînayîş bikerê. Komîteya Vernîgirewtişê Îşkenceyî yê Ewropa (CPT) dimayê serdayîşê Îmraliyî dîyar kerd ke bi Abdullah Ocalan reyde pêvînayîş kerdo yan nê. Serê nê de şarê Kurdî û pawitoxê heqê merdiman, xeylêk hetan reaksîyon ramojna.

 

Nêvat ma pêvînayîş kerdo yan nê

 

CPTyî pêwa persê, ‘şima pêvînayîş kerdo yan nê’ cewabêke nêzelal sey ‘Dimayê serdayîşê babeta vatişî yo, sey keyepelê webî yê CPTyî de ameyo vatiş, ma eşkenê ke şert û mercê çar tepişteyê Îmraliyî ameyo cigêrayîş. Bi nê amancî endamê heyetî her tim bi taybetî bi tepişteyan reyde pêvînayîş kenê’ da. Bi no hawa baleantî serê metodê xo yê pêroyî û nêvat ke ma pêvînayîş kerdo yan nê.

 

Hemsereka  European Association of Lawyers for Democracy  (Yewîya Huqûqnasê Ewropa) û aktîvîsta World Human Rights (ELDH) Barbara Spînellî tecrîdê serê Abdullah Ocalanî, helwestê CPTyî û sey avûkate hewldayîşê xo ercna.

 

‘Mektubanê ma CPTyî berd Îmraliyî’

 

Barbaraye da zanayîş ke sey avûkate mektube şirawitê wezaretê dade ya Tirkîya û vat her çiqas cewab nêgîrê zî nê mektuban CPTyî berdo Îmraliyî û vat: “Ma bawer ê ke nê mektubî do feydeyê xo bibê. Dimayê nê mektuban CPT şi Îmraliyî. La heyetê CPTyî bê desturê Tirkîya netîce pare nêkerê. Seba dayeyan pare bikerê, rapor biweşînê ganî bi Tirkîya reyde pê bikerê. Ma seba na polîtîkaye bi rastî xemgîn ê. Ganî CPT çîyê bîyaye pare bikero. Ma hukmatê Tirkî ra nêzdîbîyayîşêk zelal pawenê.”

 

‘Do tarx nê binpaykerdişê heqan pers bikero’ 

 

Barbaraye dîyar kerd ke nê binpaykerdişê heqan ê hemverê Abdullah Ocalanî û tepişteyê bînan binpaykerdişê tewr pîlî yê seserra peyînî yo û vat: “Ez eşkena vajî,  birêz Ocalan û tepişteyê bînî bi serran o bi hawayêkê bêhuqûqî yenê tecrîdkerdiş. No tecrîd yeno manaya mahkumkerdişê cuya ci. No tecrîd hemverê heme peymanê heqê merdiman o ke Tirkîya îmza kerdo. Tena sebebêkê ci esto, o zî sîyasî yo. Hukmatê Tirkî berpirsyarîyê heqê merdiman verê çiman de nêgîno. Do kitabê tarîxî nê tecrîdî binusê.”

 

‘Ganî CPT nika qisey bikero’

 

Barbaraye qiseykerdişê xo wina dewam kerd: “Serdayîş serê rewşa lezgînî de ameyo kerdiş. Ez polîtîka CPTyî rexne kena. CPT tena goreyê metodê komîteyî têgêreno. Tîya de di problemî estê. Oyo ewil hukmatê Tirk o. Hukmatê Tirkî destur bido, CPTeşkeno hîra agahîyan bido. Seba CPT dayeyan pare bikero û şert û mercê Ocalanî pare bikero, ganî ma teda bikerê. Di serrî dima nê ganî CPT nika qisey bikero. Waştişê ma oyo ke dayeyê Îmraliyî ganî bêrê parekerdiş.”

 

‘Tecrîdo giran seba bêvengîya Ewropaye yo’

 

Barbaraye vat, avûkatî babeta pêvînayîşê bi Abdullah Ocalanî reyde israr ê û vat: “Astengkerdişê pêvînayîşê avûkatan ê bi tepişteyan reyde tu huqûqî de nîno qebûlkerdiş. Na rewşêke lezgîn a. Her cayê dina de wazenê rewşa Ocalanî bimusê û wazeno bi avûkatanê xo reyde pêvînayîş bikero. Dadgeha Heqê Merdiman ê Ewropa vana ke ganî Ocalanî teberê Îmraliyî de roşnayî bivîno. Seba nê ma na rewşe bi tu hawa qebûl nêkenê. Giranbîyayîşê tecrîdî seba bêvengîya Ewropa yeno kerdiş. Rolê CPTyî girîng o. CPT bi desan rey seba şertê Îmraliyî bêro başkerdiş pêşnîyaz û îqaz kerd. Problem oyo ke Tirkîya goş nêdana hişyarî û pêşnîyazîyê CPT û ne zî mekanîzmayê mîyanneteweyî.”

 

‘Tirkîya de sîstemê heqê merdiman vînî kerd’

 

Barbaraye vat: “Sîstemê heqê merdiman babeta vindarnayîşê netew dewletan de qels maneno û wina vat: “Tirkîya de sîstemê heqê merdiman zaf xirab o. No binpaykerdiş tena hemverê Ocalanî ney, hemverê şarê Kurd z bi ca yeno. Ma nê Cizîr de zî dî. Ma qedexeyê tebervejîyayîşê kuçeyan de çîyê ke bodruman de ameyî ciwîyayîş dî. Bi hezaran sivîlî ameyî înfazkerdiş. Seba nê sîstemê heqê merdiman ê Tirkîya vînî kerdo. Seba nê zulmê hemverê birêz ocalanî zî parçeyêkê polîtîkayê qirkerdişê hemverê Kurdan o. ganî ma cîya nêgrê dest. Ganî ma hemverê nê stratejiyê sûcî de vinderê. Çîyê ke bikewê serê milê ma ma do bikerê. Ganî ma hemverê nê binpaykerdişan û bêhuqûqîyan çimanê xo panêdê.”