STENBOL - Cinîyê ke Rojawan de şerê hemverê DAIŞî de tutanê xo vînî kerdî reaksîyon mojnayî hêrişê ke hukmatê tirkî dayo dest pêkerdiş û wina vatî: “Ganî ma wayîrê destkewtişanê ke bi bedêlanê girdan ameyî destfînayîş, bivejîyê.”

 

Hukmatê tirke teqayîşê 13ê Teşrîna Peyêne yê Raşteyê Îstîklalî yê Stenbolî kerd bahane û şewa 19ê Teşrîna Peyêne ya ke girê dayêne 20ê Teşrîna Peyêne de hemverê bajarê Vakur û Rojhelatê Sûrîye û tay herêmanê başûrê Kurdistanî de pê teyareyê şerî bi hawayêk hemwext hêriş da dest pêkerdiş. Heta nika xeylê ca, nêweşxane, kewarê xelle, firin û cayê ke cuya merdimî bi înan yeno îdamekerdiş dîyayî bombeyan ver û ameyî rijnayîş. Netîceyê hêrişan de xeylê kesî dinyaya xo bedelnayî û Girê Miştenûrî bi taybet hetê teyareyanê şerî yeno hedefgirewtiş.

 

Kobanê seba merdimîye bî umud

 

2014î de badê vatişê serekkomar Tayyîp Erdoganî yê ‘Kobanê ver bi kewtişî de yo’ bihezaran kesî seba kantonê Kobanê şî qezaya Pirsûs ya Riha û çalakîya nobete ya sînor pê ard. Bajaranê Tirkîya û Kurdistanî ra şar herikîya raşteyan û bî vengê Kobanê, bî hemkarê xoverdayîşî. Bi hezaran kesî têlanê sînorî derbaz kerdî, şîyî hetê Kobanê û hemverê DAIŞî de têkoşîn rayra berdî. Têkoşînê înan bi rojan dewam kerd, sînoran rincan kerdî û hetê enternasyonel vejîya raşte. Xeylê cayê dinya ra şervanî ameyî, paştî dayî pawitişê cewherî yê Şarê Kurdî, bi têkoşîno ke pîya dayî DAIŞî çin kerdî û seba merdimîye bîyî umud.  

 

Keyeyê ke nê prosesî de tutê înan bajaranê Tirkîya ra tewrê xoverdayîşê Rojawanî bîyî û xoverdayîş de dinyaya xo bedelnayî, derheqê hêrişanê dewleta tirke de ajansê ma rê qisey kerdî. 

 

‘Hemverê zilmî de serewedarnayîş’

 

Şahoz Suruç (Şehmus Budak) serra 2014î de Kobanê de dinyaya xo bedelnaye. Dayîka Şahoz Suruçî Kevser Budake da zanîyîş ke lajê aye emrêk şenik girêdayeyê têgêrayîşê azadîye ya Kurdî bî û vat ke lajê aye hemverê zilmê serê Şarê Kurdî de serra 2011î de qezaya Serêkanî ya Riha de tewrê YPGyî bî û Serêkanî de hemverê DAIŞî de têkoşîn kerd. Kevsere bale ant vatişê Tayyîp Erdoganî yê ‘Kobanê ver bi kewtişî de yo’ ser û vat ke badê nê vatişan lajê aye Şahoz vato ‘Ma do zî şêrî Kobanê’ û bi embazanê xo reyde verê xo dayî Kobanê.

 

Verê ke bireso Kobanê dinyaya xo bedelnaye

 

Kevsere da zanayîş ke hema lajê aye nêresabî Kobanê rayîrê Kobanê de pêkewtişêk giran de dinyaya xo bedelnayî û wina dewam kerd: “Bajaro ke lajê mi seba ci canê xo feda kerd nika hetê hukmatê tirkî ra yeno bombardumankerdiş. Ganî nê hêrişî bilez bêrê vindarnayîş. Bi seyan kesî tîya de şehîd kewtî. Cuyêka weş tîya de ameye awankerdiş. Xoverdayîş, do reyda tîya de xover bido. Mekteban ra bigêrêne xeylê mijaran de sîstemê xo awan kerd. Nika reyna hêriş kenî. Êdî bes o nê zilmî rê.”

 

‘Seba azadkerdişî şî’ 

 

Dayîka, Fermandarê Hêzê Azadîya Yewbîyaye (BOG) û endamê Partîya Komunar yê Şorişgeran (DKP) Ulaş Bayraktaroglu (Mehmet Kurnaz), Melîke Bayraktarogluye ard ziwan ke lajê aye 19ê Teşrîna Peyêne ya 2014î de tewrê YPGyî bîyo û qiseykerdişê xo wina domnaye: “No ca binê dagirkerîya DAIŞî de bî. Seba azadkerdişê tîya şî. Tewrê tugaya enternasyonalan bî. Şerê mîyanenî yê Isparta de wextê faşîst û şorişgeran de şer kerd, heme dinya bi taybetî Ewropa ra çepgirî şîyî Ispanya û tîya de tugaya enternasyonalan awan kerdî û bi şorişê Ispanya mil bi mil têkoşîn dayî. Nika bi eynî paştîdayîşî enternasyonalî şinê Rojawan.”

 

‘Çîyo ke bêro kerdiş xoverdayîş o’

 

Mehmet lajê Melîke Bayraktarogluye hemleya azadkerdişê Minbicî de ca girewt û azadkerdişê 26 dewan rê serkêşî kerd û 9ê Gulana 2017î de Reqa de teqayîşê bombeyi de dinyaya xo bedelnaye. Melîkeye dîyar kerd ke dewleta tirke destur nêdana cenazeya lajê xo bigêra û coka ra Dêrikê Rojawanî de ameyo definkerdiş û vat: “Nika sînyalê şerê newe yeno dayîş û no kayê dinya yo. Rojawa Ukrayna û herêmanê bînan yê şerî de kayê lêşinî yenê kaykerdiş. Coka ra çîyo ke yeno kerdiş xoverdayîş o. Ganî wayîrê Şorişê Rojawanî ke bi bedêlanê giranan ame destfînayîş, bêro vejîyayîş.”