RIHA - Çalakîya Nobeta Edaletî ya keyeyê Şenyaşarî ewreo zî roja 643ine de dewam kena. Keyeyî serê hesabê xo yê medyaya dîjîtale de nê mesajî pare kerd: "Dewayêke serekkomar ci pawena esta. Heme dinya nê bêedaletî taqîb kena."

 

Merdim û pawitoxê Parlamenterê AKPyî Îbrahîm Halîl Yildiz 14ê hezîrana serra 2018ine de hêrişê dikanê Keyeyê Şenyaşarî yê Pirsûsê Rihayî kerd. Netîceyê hêrişî de mêrde û 2 lajê dayîka Emîne Şenyaşare ameyî qetilkerdiş. Emîne Şenyaşar û lajê aye Ferît Şenyaşar ke qirkerdiş de bi birîndarî xelas bibî, 9ê Adara 2021ine de vernîya Edlîyeyê Rihayî de dest bi Nobeta Edaletî kerdî. Çalakîya keyeyî roja 643ine de dewam kerd. Seba ke peynîya hewteyî edlîye padaye ya, keyeyî çalakîya xo Pirsûs de keyeyê xo de dewam kerd. 

 

Keyeyî derheqê çalakîye de serê hesabê xo yê medyaya dîjîtale de nê mesajî pare kerd: "Dewayêke serekkomar û parlamenter ci pawenê esta. Vernîya dewa de parlamenterê ke nêweşxane de sûcê hemverê merdimayî kerd, sey qehreman ame mojnayîş. Coka pêro kesî baş pê zanenê ke na dewaye de qerarêkê adilane nîno dayîş. Pêro dinya nê bêedaletî taqîb keno. Her çiqas erey bikewo zî do çîyo bi heq bi ca bêro."