MERKEZÊ XEBERAN - Serdozgerê Komara Anqarayî yê verê Bulent Yuceturk derheqê dewaya “zewacê tutan" ê cemaetî de wina vat: “Qerar, nîşaneyê citsandartîyê hukmî yo. Eke versucî teber de bê, beno ke delîlî bêrê çinkerdiş."

 

Awankerdoxê Weqfê Hîranûrî yê girêdayeyê Cemaetê Îsmaîlaga, Yûsûf Ziya Gumuşel kênaya xo ya bi nameyê H.K.G.ya 6 serrî bi murîdê xo yê bi nameyê Kadîr Îsteklî yê 29 serre reyde “zewicnabi" îdianameyê Serdozgerîya Komare ya Anadoluyî derheqê serebûtî de hetê 2yîn Dadgeha Cezaya Giran ya Anadoluyê Stenbolî ra ame qebûlkerdiş. Dadgehe, tedbîrê girewtişê faîlan nêkerd falîyet û roniştişê  ewil ê dewa 22yê gulana 2023 de bêro vînayîş. Serdozgerê Komara Anqarayî yê verê Bulent Yuceturk derheqê dewa de bi rojnameyê Cumhuriyetî reyde qisey kerd.

 

Bulent Yuceturkî vat, demê seba roniştişî ameyo dîyarkerdiş  “normal” nîyo û wina vat: “No qerar, citstandartîyê hukmî nîşan dano. Dewaya ameya akerdiş, cezayêke giran û dewaya îstîsmarkerdişê tutêke ya. Nêbeno ke roniştişê dosyayê wina xesas hende bi demî reyde bêrê verdayîş. Eke versûc û şahidî teber de bê, îxtîmal esto ke delîlî bêrê çinkerdiş. Dadgehe qerarê xo de nê çî peygoş kerdo. Îxtîmalê çinkerdişê delîlan esto, sucê katalogî yo. Dewayê winayîn de cezayê giranî yenê dayîş. Demo ke ma ewnîyenê nê pêroyînan ra, ganî tedbîrêkê biameyîne girewtiş."