NAVENDA NÛÇEYAN - Êrîşên dewleta Tirk ên li ser Bakur û Rojhilatê Sûriyeyê her ku diçe zêde dibin. 

 

Êrîşên dewleta Tirk ên li ser Bakur û Rojhilatê Sûriyeyê her ku diçe zêde dibin. Gelek herêm hemwext tên bombekirin.

 

Dewleta Tirk gundê Siftek ê rojavayê Kobanê û gundê Qeremox ê rojhilatê Kobanê bombebaran kir. Di êrîşan de bi taybetî navenda tenduristiyê ya gundê Qeremox bû hedef. Şeva 19-20’ê Mijdarê li Kobanê nexweşxaneyeke Kovîd-19  bû hedefa bombeyan û nexweşxane rûxiyabû.

 

Êrîşên li gelek herêman bênavber dewam kirin, li gorî saeta herêmî saet 15.40'an li Kobanê gundên Zormixar, Ziyaretê û Çariqlî careke din hatin bombekirin.

 

Li Tirbespiyê

 

Dewleta Tirk hemwext bi êrîşên li Kobanê re êrîşên xwe yên li Tirbespiyê jî zêde kirin. Balafireke bê mirov gundê Gir Dahol ê dikeve başûrê rojavayê Tirbespiyê bombe kir. Her wiha cihekî qada petrolê ya El Ode du caran hate bombebarankirin, gundê Lêlan û qadeke petrolê ya nêzî Gir Daholê jî hatin bombebarankirin.

 

Êrîşî Qamişloyê kirin

 

Dewleta Tirk 3 hawan avêtin gundê Alîfero ê Qamişloyê. Di êrîşê de tiştek bi kesî nehat.

 

Li Dêrazorê êrîşên hewayî

 

Herêma Dêrezorê jî bû hedefa êrîşan. Gundê Mekmen ê 70 kîlometre dûrî sînor e, 5 caran ji aliyê balafirên şer ve hate bombekirin.

 

Li Tilt Temirê bombebaran

 

Li gorî saeta herêmî saet 15.50’an balafirên şer ên dewleta Tirk gundên Til Leben, Gûzeliyê û Til Tewîl ên rojavayê Til Temirê bombe kirin.

 

Top avêtin gundê Amûdê

 

Hemwext bi topan li gundên Şorikê, Haside û Til Kefe yên bajarê Amûdê dan.