AMED - Platformê Cinîyanê Dicleyê Amedî û hemparê Torra Têkoşînê hemverê Şîdetî yê Amedî verê bînaya PTTyî de bi sloganê "Jin jiyan azadî" startê 25ê Teşrîna Peyêne dayî. Cinîyan dima ra tepişteyan rê qert şawitî.

 

Platformê Cinîyan ê Dicle Amedî û hemparê Torra Têkoşînê hemverê Şîdetî yê Amedî verê bînaya PTTyî ya Qezaya Rezanî ya Amedî de çarçewaya 25ê Teşrîna Peyêne Roja Têkoşînê hemverê Şîdetê serê Cinîyan de ameyî têhet û startê çalakîyan ame dayîş. Xeylêk cinî  beşdarê çalakîyan bî û pankartê "Jin jiyan azadî" ame akerdiş. Serê nameyê cinîyan de avûkatê Baroyê Amedî Îrem Yildiz eşkerayîye wend.

 

Cinîyê ke têkoşînê azadîye danê ameyî silamkerdiş

 

Îrema ke da zanayîş ke Wayê Mîrabalî yê ameyî qetilkerdiş anê vîr û wina vat: “Çayê dinya beno wa bibo, ma cinîyê ke têkoşîn kenê silam kenê, ma do çalakîyê xo hewteyêkê dewam bikerê û ma bi şawitişê qertan ê seba cinîyê tepişteyî dest pêkerd.”

 

Îreme eşkerayîye de bale ant serê polîtîkayê şerê taybetî û neql kerd ke polîs û leşkerî yenê pawitiş. Sewbîna Îreme da zanayîş ke yeno waştiş çimê cinîyan  bitersnê û vat, do pêwa pêro heme tedayan têkoşînê xo yê raşteyan dewam bikerê û vengê xo berz bikerê. Sewbîna vat, do cinî fek azadîya xo ra vera nêdê.

 

Eşkerayîye bi sloganê, "Biciwîyo xoverdayîşê cinîyan”, "Jin jiyan azadî","Nagîhan Akarsele rûmeta ma ya" û "Ma bêveng nêbenê" peynî bi. Dimayê eşkerayîye qert cinîyê tepişteyan rê ameyî şawitiş.

 

Bernameyê 25ê Teşrîna Peyêne ya Amedî wina ya:

 

*19ê Teşrîna Peyêne /Îne 

 

Dimayê serdayîşê Dayîkê Aştîye do vilawikî bêrê vilakerdiş

 

Ca: Parkê Koşuyoluyî

 

Saete:12.00

 

*20ê Teşrîna Peyêne/Yewşeme

 

Do Nagihan Akersele û Jîna Mahsa Emînî bêrê yadkerdiş

 

Ca: Bînaya KASEDî

 

Saete: 17.00

 

*21ê Teşrîna Peyêne/Dişem 

 

Atolyeyê Tekstilî rê ziyaret

 

Serdayîşê Atolyeyê Tekstîlî 

 

*24ê Teşrîna Peyêne/Paşeme 

 

Do serdayîşê Nobeta Edaletî bêro kerdiş

 

Ca: Verê bînaya Edliyeyî

 

Saete: 11.00

 

*25ê Teşrîna Peyêne/Îne 

 

Do Raporê Torra Şîdetî bêro wendiş

 

Ca: Bînaya Baroyê Amedî 

 

Saete: 12.30

 

*25ê Teşrîna Peyêne/Îne

 

Rayîr ra şîyayîşê 25ê Teşrîna Peyêne yê Şewe 

 

Saete:17.00